जळगाव बुद्रुकच्या प्राथमिक शाळेत शाळापूर्व तयारी मेळावा संपन्न

सा.शनैश्वर टाइम्स वृत्तसेवा

नांदगाव-: वार्ताहर

तालुक्यातील जळगाव बुद्रुक येथील जिल्हा परिषदच्या प्राथमिक शाळेत शाळापूर्व तयारी मेळावा मोठ्या उत्साहात संपन्न झाला.

     अंगणवाडीतून इयत्ता पहिलीत दाखल होणाऱ्या विद्यार्थ्यांसाठी शाळापूर्व तयारी मेळाव्याचे आयोजन करण्यात आले होते.यावेळी गावातून प्रभातफेरी काढण्यात आली.' 'मेळाव्याला चला, तुम्ही मेळाव्याला  चला', 'मेळाव्याला जाऊया प्रवेश निश्चित करूया' अशा घोषणा यावेळी देण्यात आल्या.

        तदनंतर शाळा व्यवस्थापन समितीचे अध्यक्ष बाळासाहेब कांदे यांनी फित कापून मेळाव्याचे उदघाटन केले. या प्रसंगी शाळेत नावनोंदणी, शारीरिक विकास, भौतिक विकास, सामाजिक व भावनिक विकास, भाषाविकास, गणनपूर्व तयारी तसेच मार्गदर्शन व साहित्य वाटप अश्या एकूण ७ स्टॉलची मांडणी करण्यात आली होती. शालेय परिसरात तोरण,रांगोळ्या, भित्तीपत्रके, सुचनाफलक अशी सुंदर सजावट करण्यात आली होती. मेळाव्यात प्रारंभी  शैलेश टिळेकर  यांनी प्रस्ताविकातून उद्देश समजावून सांगितला. 

      सदर मेळाव्यात येत्या शैक्षणिक वर्षासाठी दाखल होणारे दाखलपात्र विद्यार्थी पालकासह उपस्थित होते. प्रत्येक स्टॉलवर शिक्षक व विद्यार्थी यांनी दाखलपात्र विद्यार्थ्यांकडून विविध कृती करवून घेतल्या. श्रीम घुगे मॅडम यांनी दाखलपात्र विद्यार्थ्यांची नावनोंदणी केली तर शाळेच्या शिक्षिका श्रीमती शारदा महाले,छाया बोरसे,संगीता सोनवणे, कविता रोकडे, वर्षा थोरात यांनी विविध स्टॉलद्वारे विद्यार्थ्यांना शाळा प्रवेशासाठी मार्गदर्शन केले.

           यावेळी मुख्याध्यापक राजेंद्र काटकर  यांनी उपस्थितांना मार्गदर्शन केले. सदर मेळाव्यास शाळा व्यवस्थापन समिती सदस्य, सरपंच चिंधा गावंडे,उपसरपंच विश्वनाथ कांदे, पालक व दाखलपात्र विद्यार्थी, ग्रामस्थ, ग्रा.प.सदस्य तसेच अंगणवाडी सेविका सौ.छाया सोनवणे,सौ.मंगल कांदे,मदतनीस श्रीमती विमल आंधळे उपस्थित होत्या.उपशिक्षक अजिंक्य गायकवाड यांनी आभार मानले.