जळगाव बुद्रुक ग्रामपंचायतीचा पंतप्रधान मोदींकडून गौरव.. आदिवासी युवकाशी आज पंतप्रधान नरेंद्र मोदी मन की बात मधून संवाद साधणार.!
विशेष बातमी
सा.शनैश्वर टाइम्स वृत्तसेवा
नांदगाव-: संतोष कांदे
प्रधानमंत्री आवास योजनेतून मिळालेले घरकुल अवघ्या ३० दिवसात पूर्ण केल्याने नांदगाव तालुक्यातील जळगाव बुद्रुक येथील आदिवासी तरुण सोमनाथ हरी मेंगाळ याचे भारताचे पंतप्रधान नरेंद्र मोदी यांनी विशेष कौतुक करून आज ते (दि.३१) रोजी मन की बात मधून त्याच्याशी संपर्क साधणार असल्याने जळगाव बुद्रुक ग्रामपंचायत देशपातळीवर जाऊन पोहचली आहे.
या बाबत अधिक असे की, सन २०२१ -२०२२ या कालावधीत तालुक्यात प्रधानमंत्री आवास योजनेतून जी घरकुले प्राप्त झालीत त्यात जळगाव बुद्रुक ग्रामपंचायत हद्दीत असणाऱ्या सोमनाथ हरी मेंगाळ या ठाकर समाजाच्या (आदिवासी) तरुणाचा ही समावेश होता.त्याने व त्याच्या पत्नीने याचा आनंद व्यक्त करत अवघ्या ३० दिवसात सदर घरकुल पूर्ण केले.आणि त्याचा हा विक्रम महाराष्ट्रातच नव्हे तर देशात प्रथम क्रमांकाचा ठरला असल्याने पंतप्रधान मोदी यांनी त्याचे यापूर्वीच विशेष कौतुक केले.
आज मन की बात मधून ते त्याच्याशी संवाद साधणार आहेत.जिल्हाधिकारी डी. गंगाथरण यांनी सोमनाथ ला जिल्हाधिकारी कार्यालयात पाचारण केले असून काही वेळात हा संवाद होणार असल्याचे त्यांनी सांगितले.
प्रतिक्रिया-: गणेश चौधरी गटविकास अधिकारी
सदर लाभार्थी सोमनाथ हरी मेंगाळ यांनी विहित मुदतीत घरकुल पूर्ण केले.आणि सदर घरकुलाचे गुणवत्तापूर्व बांधकाम केले.या बाबत सदर लाभार्थी ,ग्रामसेवक किरण घुगे व व ग्रामपंचायतीचे ही कौतुक करतो.आणि सोमनाथ चा आदर्श इतर लाभार्थ्यांनी ही घ्यावा.
Comments
Post a Comment