आमदार कांदे यांच्या प्रयत्नाने सुरक्षित शिक्षण.!

सा.शनैश्वर टाइम्स वृत्तसेवा

नांदगाव-: वार्ताहर

तालुक्याचे आमदार सुहास कांदे यांच्या प्रयत्नाने शहरातील नगरपरिषद शिक्षण मंडळाच्या शाळा दुरुस्तीसाठी सुमारे २ कोटी ५० लाख रुपये मंजूर झाले आहेत.त्यामुळे या शाळांच्या वनवास अखेर संपला आहे.

      नगरविकास खात्याचे मंत्री ना.एकनाथ शिंदे यांच्याकडे आमदार श्री कांदे यांनी नांदगाव व मनमाड येथील नगरपरिषद शाळा दुरुस्तीसाठी निधी उपलब्ध करून देण्याची आग्रही मागणी केली होती.त्यानुसार नांदगाव ला दोन कोटी पन्नास लाख तर तर मनमाड साठी ७ कोटी ५० लाख रुपये मंजूर करण्यात आले आहेत.

         सौ अंजुम सुहास कांदे यांनी काही महिन्यांपूर्वी नांदगाव व मनमाड येथील नगर परिषद शाळांना समक्ष भेट दिली होती, यात शाळांची परिस्थिती अत्यंत बिकट असल्याचे त्यांना जाणवले, शाळेच्या इमारती जुन्या झाल्यामुळे मोडकळीस आलेल्या आहेत, या मुळे विद्यार्थ्यांना शिक्षण घेणे असुरक्षित वाटू लागले होते,त्यांच्या जीवितास धोका निर्माण झाल्याचे, असे लक्षात आले, एकंदरीत सर्व परिस्थिती सौ.कांदे यांनी आमदार सुहास कांदे यांच्या निदर्शनास आणून दिल्यानंतर आमदार श्री. कांदे यांनी सर्व शाळांची माहिती गोळा करून शासनाकडे सर्व इमारतींच्या नूतनीकरणाची मागणी पत्राद्वारे केली तसेच नगरविकास खात्याचे मंत्री एकनाथ शिंदे यांना समक्ष भेटून परिस्थिती सांगितली असता बुधवार दिनांक आठ जून रोजी मनमाड व नांदगाव नगरपरिषद शाळांच्या ईमारत दुरुस्ती साठी एकूण जवळपास दहा कोटी रुपयांचा निधी मंजूर करून प्रशासकीय मान्यतेची प्रत प्राप्त झाली आहे.

        आमदार सुहास कांदे यांच्या माध्यमातून नांदगाव मनमाड शहरातील जवळपास सर्वच शाळांची नुतनीकरण होणार असल्या कारणाने शिक्षक, विद्यार्थी व पालकांमध्ये आनंदाचे वातावरण आहे.

प्रतिक्रिया-: सुहास कांदे,आमदार नांदगाव

नगर परिषद शाळेच्या मोडकळीस आलेल्या इमारतींमुळे विद्यार्थ्यांना शिक्षण घेणे धोक्याचे असल्याचे लक्षात येताच नगर विकास खात्याचे मंत्री एकनाथ शिंदे यांच्याकडे निधीची मागणी केली आणि साहेबांनी त्वरित त्यास मंजुरी दिली लवकरच सर्व शाळेच्या इमारत दुरुस्तीचे काम सुरू होईल व विद्यार्थ्यांना सुरक्षित वातावरणात शिक्षण घेणे सोपे जाईल.