जळगाव बुद्रुकच्या प्राथमिक शाळेत विद्यार्थ्यांचे अनोखे स्वागत...

सा.शनैश्वर टाइम्स वृत्तसेवा

नांदगाव-: वार्ताहर

तालुक्यातील जळगाव बुद्रुक येथील जिल्हा परिषदच्या प्राथमिक शाळेत विद्यार्थ्यांची चक्क बैलगाडीतून ढोल ताश्यांच्या गजरात मिरवणूक काढून अनोखे स्वागत करण्यात आले.हा तालुकाभरात चर्चेचा विषय ठरला आहे.

    येथील शाळेत इयत्ता पहिलीसाठी प्रवेशपात्र झालेल्या विद्यार्थ्यांसाठी शाळापूर्व तयारी अभियान राबविण्यात आले.शालेय परिसर स्वच्छता, सुशोभन, रांगोळी द्वारे शाळा स्वच्छ व सुंदर करण्यात आली. इयत्ता १ लीत दाखल होणाऱ्या नवागतांचे स्वागत गुलाब पुष्प व फुगे देऊन करण्यात आले. सजविलेल्या बैलगाडीतून या विद्यार्थ्यांची वाजत गाजत मिरवणूक काढण्यात आली. मेळाव्याचे उदघाटन सरपंच चिंधा गावंडे यांच्या हस्ते श्रीफळ वाढवून करण्यात आले.                  मेळाव्यास शिक्षण विस्तार अधिकारी श्रीमती नंदा ठोके यांनी आवर्जून उपस्थिती दर्शवून मार्गदर्शन केले. सदर कार्यक्रमाचे प्रास्ताविक  शैलेश टिळेकर यांनी केले. अजिंक्य गायकवाड यांनी नावनोंदणी केली. मेळाव्याच्या यशस्वीतेसाठी मुख्याध्यापक राजेंद्र काटकर , अपंग समावेशीत शिक्षण तज्ञ सचिन जाधव, शिक्षिका  शारदा महाले,संगीता सोनवणे , छाया महाले,  कविता रोकडे,वर्षा थोरात, मंगल घुगे ,मनोज धात्रक आदींनी मेहनत घेतली. 

     सदर मेळाव्यास गावातील ग्रामपंचायत सदस्य,शाळा व्यवस्थापन सदस्य,अंगणवाडी सेविका सौ.मंगल कांदे,सौ.छाया सोनवणे,पालक व विद्यार्थी उपस्थित होते.