नांदगाव तालुक्याचे राजकारण निर्णायक वळणावर.? प्रथमच शिवसेना पक्ष आपल्याच आमदाराच्या विरोधात..

सा.शनैश्वर टाइम्स वृत्तसेवा

नांदगाव-: संतोष कांदे

नांदगाव विधानसभा मतदार संघातील शिवसेनेचे आमदार सुहास कांदे शिंदे गटाला जाऊन मिळाल्याने मतदार संघात प्रथमच शिवसेना आमदारांविरोधात त्यांचाच पक्ष म्हणजेच शिवसेनाच उभी टाकली असल्याचे अनपेक्षित चित्र दिसून येत आहे.

       विद्यमान आमदार सुहास कांदे यांनी शिवसेनेत प्रवेश करण्याअगोदर तालुक्यातील शिवसेना शेवटची घटका मोजत होती.अनेक पदाधिकारी भुजबळांच्या पर्यायाने राष्ट्रवादीच्या वळचणीला जाऊन बसले होते.प्रत्येक गावात शाखा असलेली शिवसेना व संपूर्ण तालुक्यात एकही फलक नसलेली राष्ट्रवादी असे संघटनात्मक चित्र असतानाही केवळ राष्ट्रवादी चा आमदार असल्याने शिवसेनेला शेवटची घरघर लागली होती.

      गेल्या १५ वर्षांपूर्वी सुहास कांदे यांनी शिवसेनेत प्रवेश केल्यानंतर प्रथम संघटनात्मक बांधणीकडे जाणीवपूर्वक लक्ष दिले.त्यांची पक्ष नेतृत्वाने तालुका संघटक या पदावर नियुक्ती केली.तेव्हा सुहास कांदे यांनी जुन्या -नव्या शिवसैनिकांची मोट बांधत शिवसेनेची पुनर्रचना केली.व तालुक्यातून संपत आलेली शिवसेना पुन्हा एकदा अग्रस्थानी आली.आणि संघटनेचा पसारा वाढलाच ; पण तालुक्यातील जवळपास सर्वच सत्ता शिवसेनेच्या ताब्यात आणल्या.दोन्ही नगरपालिका,दोन्ही बाजार समित्या,पंचायत समिती,जिल्हा परिषद सदस्य,जिल्हा बँक,त्यामुळे कांदे यांना थेट शिवसेनेचे जिल्हाप्रमुख करण्यात आले.आणि मग विधानसभा निवडणुकीत तालुक्यावर शिवसेनेचा भगवा ही कांदे यांनी मित्र पक्ष भाजपच्या मदतीने फडकवला.

       आजमितीस तालुक्यातील बहुतांश ग्रामपंचायती,सोसायट्यांवर शिवसेनेची सत्ता आहे.आणि असे सर्व आलबेल सुरू असताना एकनाथ शिंदे यांनी पक्ष नेतृत्व दखल घेत नसल्याच्या मुद्द्यावरून उठाव केला.आणि त्यात तालुक्याचे आमदार सुहास कांदे यांनी पहिलाच सहभाग नोंदवला.कारण माजी पालकमंत्री छगन भुजबळ हे निधी वाटप करताना नांदगाव तालुक्यावर सातत्याने अन्याय करत असल्याची बाब अवघ्या महाराष्ट्राला ज्ञात झाली होती.मात्र तरीही शिवसेनेच्या वरिष्ठ नेतृत्वाने दखल घेतली नाही.या अशा अनेक कारणाने आमदार सुहास कांदे यांनी उठाव केल्याचे प्रथमदर्शनी दिसून येते.

      आमदार कांदे यांनी शिवसेनेची सूत्रे हाती घेतल्यापासून अनेक जुन्या शिवसैनिकांनी दूर राहणे पसंद केले होते.माजी तालुकाप्रमुख संतोष गुप्ता यांनी सुहास कांदे यांच्या नेतृत्वाखाली शिवसेनेत प्रवेश केला खरा ; मात्र कुठलेही पद न स्वीकारता अलिप्त राहणे पसंत केले होते.मात्र आमदार कांदे यांना जिल्हाप्रमुख पदावरून हटवताच संतोष गुप्ता यांनी थेट मातोश्री गाठून 'तालुकाप्रमुख' पद मिळवले आहे.या मागची कारणे अनेक असली तरी आज मात्र हेच शिवसैनिक जय भवानी जय शिवाजी चा नारा देत सक्रीय झाले असल्याचे चित्र युवा सेना प्रमुख आदित्य ठाकरे यांच्या मनमाड येथे झालेल्या कालच्या सभेतून दिसून आले.आणि सर्वात महत्वाचे असे की,उद्धव साहेब आगे बढो च्या घोषणा देत शिवसेनेच्या बरोबर उभे राहून शिवसेनेचेच आमदार सुहास कांदे यांच्या विरोधात असल्याचे चित्र दिसून आले.मात्र उघडपणे अजून कुणी आदित्य ठाकरे वगळता आमदार कांदे यांच्यावर टीका केल्याचे दिसून आले नाही.

       मूळचे काँग्रेस, त्यानंतर भाजप,सेना,राष्ट्रवादी,रिपाई,आणि सध्या शिवसेना असा प्रवास असलेले मनमाडचे माजी नगराध्यक्ष गणेश धात्रक यांनी सुरवातीपासून सुहास कांदे यांच्या भूमिकेचा विरोध करत मातोश्री गाठली.व पक्षप्रमुख उद्धव ठाकरे यांच्या सोबत असल्याचे दाखवून दिल्याने त्याचे जिल्हाप्रमुख रूपाने त्यांना तत्काळ बक्षीस मिळाले.गेल्या निवडणुकीत आमदार कांदे यांच्या बरोबरीने त्यांनी ही उमेदवारी मागितलेली असल्याने आता साहजिकच शिवसेनेच्या उमेदवारीवर त्यांचा हक्क प्रस्थापित झाला आहे.आणि ही गोष्ट सहजतेने घेण्यासारखी नाही.कारण तालुक्यातील वंजारी समाज व शिवसैनिक सुहास कांदे व गणेश धात्रक यांना सम प्रमाणात मानतील किंबहुना मानतात.ही आमदार सुहास कांदे यांच्यासाठी धोक्याची घंटा आहे.