नस्तनपूरला धार्मिक क्षेत्रासह पर्यटन स्थळाचा ही दर्जा मिळावा - भाविकांची मागणी

सा.शनैश्वर टाइम्स वृत्तसेवा

नांदगाव -संतोष कांदे

प्रभू रामचंद्र यांनी स्वहस्ते स्थापन केलेल्या नस्तनपुर येथील श्री.शनी मंदीर या धार्मिक स्थळाची माहिती सोशल मीडियाच्या जमान्यात जगभर पसरली आहे.मात्र या क्षेत्राचा सर्वांगीण विकास होणे गरजेचे असल्याने या क्षेत्राचे धार्मिक पावित्र्य सांभाळून पर्यटन स्थळाचा दर्जा मिळावा अशी मागणी जोर धरू लागली आहे.

    रामायण काळात दंडकारण्य म्हणुन प्रसिद्ध असलेल्या या ठिकाणी  प्रभू  रामचंद्र  सीता माईचा  शोध  घेत  पोहचले  असता, सकाळी  सूर्याला अर्ध्य देत असताना शनी  मूर्ती त्यांच्या हातात आली. आणि  सूर्य देवतेच्या सांगण्यावरून त्यांनी श्री. शनी  देवतेची  स्थापना या ठिकाणी केली.

    गेल्या दोन वर्षातल्या कोरोना लपंडावाने श्री शनी देवतेला ही देऊळ बंद चा अनुभव घ्यावा लागला. मात्र आता कोरोनाचा कहर ओसरल्याने सर्वत्र आनंदाचे वातावरण आहे. आणि म्हणूनच आता येथील श्री शनी देवतेच्या सकाळ च्या आरतीला मोठ्या प्रमाणात गर्दी होऊ लागली आहे.

     दर शनिवारी या ठिकाणी सकाळी व दुपारी होणाऱ्या महारती साठी भाविकांची मोठी गर्दी होऊ लागली आहे. श्री शनी मंदिर संस्थान ने काही वर्षांपूर्वी येथे पंचक्रोशीतील भाविकांच्या हस्ते आरती ची प्रथा सुरु केली होती. ती प्रथा खूप लोकप्रिय झाली होती. व या क्षेत्राची कीर्ती ही सर्वदूर पोहचली होती. म्हणुन कोरोना काळापासून बंद पडलेली ती प्रथा पुन्हा सुरु करावी अशी मागणी केली जात आहे.

    आणि ही प्रथा सुरु झाल्यास या ठिकाणी भाविकांची गर्दी वाढून पर्यटन स्थळास  चालना मिळू शकेल अशी भाविकांची धारणा आहे.