काळ आला होता पण.......बोराळे येथील धक्कादायक घटना..... नदीवर पूल न झाल्यास शेतकरी जल समाधी घेणार.!

सा.शनैश्वर टाइम्स वृत्तसेवा

नांदगाव - संतोष कांदे

शेतीकाम आटपून घरी परतत असलेल्या शेतकरी कुटुंबाला नदीच्या पाण्याचा अंदाज न आल्याने बैलगाडी सह वाहून जाण्याचा बिकट प्रसंग उद्भवला.मात्र काही सामाजिक कार्यकर्त्यांच्या अथक प्रयत्नाने या कुटुंबाला,बैलांसह वाचवण्यात यश आले.सदर घटना तालुक्यातील बोराळे येथे घडली.

       काळ आला होता.पण...याची प्रचिती आणून देणाऱ्या या घटनेने गावकरी अत्यंत संतप्त झाले होते.या नदीवर पूल न झाल्यास संपूर्ण गाव या नदीत जल समाधी घेतील असे बोलले जात होते.सन …1972 ते 2022 या कालावधीत याच नदीच्या पाण्यात आठ जण वाहून गेल्याच्या घटना घडल्या आहेत.

     बोराळे गावाचे संपूर्ण क्षेत्र 1 हजार हेक्टर असून,त्यापैकी 500 हेक्टर क्षेत्र हे गिरणा नदीच्या पलीकडे आहे.सद्यस्थितीत शेतीकामे उरकण्याकडे सर्वांचाच कल दिसून येत आहे.शेतात वेचून ठेवलेला कापूस बैल गाडीत भरून राजेंद्र चंदीले हे पत्नी सुरेखा,मुलगा गौरव व अजून एक कुटुंबं कोमल सोळूके,आशा सोळूके असे पाच जण बैल गाडीत बसून गावात येत असताना पाण्याचा अंदाज न आल्याने बैल गाडी पलटी झाली.व बैलांसह हे पाच जण ही वाहून जाऊ लागले.

      सदर गंभीर प्रसंग लक्षात आल्यानंतर संदीप सोलुंके,किशोर सौंदाणे,पांडुरंग सौंदाणे,पंकज देवरे,शैलेंद्र सोलुंके या तरुणांच्या लक्षात आल्याने त्यांनी यततकाळ नदीत उडी मारून प्रथम महिलांना बाहेर काढले.त्याच बरोबर बैलांना दोराची फाशी बसल्याने त्यांची वाहत्या पाण्यात जीवघेणी धडपड सुरु होती.तेव्हा या बैलांना ही मुक्त करण्यात यश मिळाले.सदर नदी पात्रात सध्या 10 हजार ते 15 हजार क्यूसेक पाण्याचा विसर्ग सुरु आहे.

      सध्या कापसाला 10  हजार रुपये प्रति क्विंटल भाव मिळत आहे.आणि शेतात ठेवलेला शेतमाल चोरीस जाण्याच्या घटना वारंवार घडत असतात.म्हणून सदर शेतकरी राजेंद्र चंदीले यांनी आपला चार क्विंटल कापूस (किंमत-४0 हजार) घरी आणत होते.मात्र नदीवर पूल नसल्याने त्यांचे धाडस जीवावर बेतले असते.जीव वाचला मात्र ज्या कापसासाठी जीव धोक्यात घातला तो कापूस मात्र डोळयादेखत वाहून गेला.

         या शेतकऱ्यांनी व सरपंच राजेंद्र पवार यांनी मागच्या आठवड्यात तालुक्याचे आमदार सुहास कांदे यांची भेट घेऊन सदर पुलाचा प्रश्न मार्गी लावण्याची विनंती केली असता,आमदार श्री.कांदे यांनी पालकमंत्री नियुक्ती नंतर हा प्रश्न मार्गी लावतो असे आश्वासन दिले होते.