प्लास्टिक चा बेकायदेशीर वापर करणाऱ्या व्यापाऱ्यास पाच हजाराचा दंड. नांदगाव नगरपालिका प्रशासनाची धडक कारवाई

सा.शनैश्वर टाईम्स वृत्तसेवा

नांदगाव -: संतोष कांदे 

एकेरी वापरल्या जाणाऱ्या प्लास्टिकपासून बनवलेल्या वस्तूंवर बंदी असतांनाही नांदगाव शहरातील मुख्य बाजारपेठेत सर्रास विक्री करणाऱ्या विक्रेत्यावर नांदगाव नगर पालिकेच्या पथकाने कारवाई करत सुमारे ३ किलो सिंगल युज प्लास्टिक जप्त करत विक्रेत्यास ५ हजार रुपयांचा दंड केला आहे.

      सिंगल यूज प्लॅस्टिक म्हणजे प्लास्टिकपासून बनवलेल्या अशा वस्तू ज्याचा आपण एकदाच वापर करू शकतो. त्या वस्तूंचा एकदा वापर केल्यानंतर फेकून द्यायच्या असतात. जर या वस्तूंचा वापर सातत्यानं केला, तर मात्र त्यामुळे पर्यावरणाला हानी पोहोचते. त्यामुळे आरोग्यालाही हानी पोहोचण्याचा धोका संभवतो. जर कोणी एकेरी वापर प्लास्टिकचा वापर करताना आढळलं तर, त्यांना शिक्षा केली जाईल, असे पर्यावरण मंत्रालयाकडून स्पष्टपणे सांगण्यात आले आहे. कोणी सिंगल यूज प्लास्टिकचा वापर करत असेल तर तुरुंगवास आणि दंड आशा दोन्ही शिक्षांची तरतूद करण्यात आली आहे. पर्यावरण संरक्षण कायदा कलम १५ अंतर्गत एकेरी वापरल्या जाणार्‍या प्लास्टिकच्या वापरावर कारवाई केली जाईल असेही या कायद्यात म्हटले आहे. असे असतानाही नांदगाव शहरात असलेल्या मुख्य बाजारपेठेत सिंगल यूज प्लॅस्टिक सर्रास विक्री होत असल्याची माहिती नांदगाव नगर पालिकेच्या पथकाला समजली होती. त्यानुसार पथकाने सदर दुकानावर कारवाई करत मुद्देमाल जप्त केला आहे. या कारवाईत सुमारे ३ किलो सिंगल युज प्लास्टिक जप्त करत करण्यात आले आहे. तर या विक्रेत्यास ५ हजार रुपयांचा दंडही करण्यात आला आहे.

या कारवाई मुख्याधिकारी विवेक धांडे यांच्या मार्गदर्शनाखाली कर निरीक्षक राहुल कुटे, विजय कायस्थ, रामकृष्ण चोपडे, निलेश देवकर, सुनिल पवार, अंबादास सानप, विजया धनवट यांच्या पथकाने कारवाई केली आहे. यापुढे देखील नांदगाव शहरात प्लास्टीक बंदीची कारवाई मोठया प्रमाणात सुरू राहणार असुन नागरीकानी प्लास्टिकची विक्री व वापर टाळावा असे आवाहन पालिकेच्या वतीने करण्यात आले आहे.