हिसवळ ते नांदगाव स्वतंत्र बससेवा सुरु करा.! राष्ट्रवादी काँग्रेसची मागणी अन्यथा आंदोलन छेडणार..

सा.शनैश्वर टाईम्स वृत्तसेवा

नांदगाव -: संतोष कांदे

तालुक्यातील हिसवळ बुद्रुक येथून नांदगावला येणाऱ्या विद्यार्थ्यांसाठी स्वतंत्र बससेवा सुरु करण्याची मागणी राष्ट्रवादी काँग्रेसच्या वतीने आगार प्रमुखांकडे करण्यात आली आहे.मागणीचा विचार न झाल्यास आंदोलन छेडण्याचा इशारा ही देण्यात आला.

         आगार प्रमुख विश्वास गावित यांना दिलेल्या निवेदनात पुढे असे म्हटले आहे की, हिसवळ बुद्रुक येथे इयत्ता पाचवी ते दहावी पर्यंत माध्यमिक विद्यालय असून या विद्यालायामध्ये हिसवळ बुद्रुक, शास्त्रीनगर, धोटाने खु., काळेवस्ती, तसेच परिसरातील अनेक गावांमधून अनेक विद्यार्थी शिक्षणासाठी येत असतात, परंतु सकाळी १०:३० वाजता शाळा भरण्याच्या वेळेत व सायंकाळी ०४:३० वाजता शाळा सुटण्याच्या वेळेत बस नसल्याकारणाने बऱ्याच विद्यार्थ्यांना घरीच राहावं लागतं किंवा प्रयत्न करून शाळेत आल्यानंतर घरी

जाण्यास लवकर गाडी मिळत नसल्यामुळे रात्री उशिरा घरी जावं लागते. त्यामुळे विद्यार्थ्यांच्या शिक्षणावर त्याचा मोठा परिणाम होऊ शकतो. सदर विद्यार्थ्यांना एस. टी. चा रितसर पासही आहेत. आणि विशेष म्हणजे ७० मुली व ४० मुलं असे एकूण ११० विद्यार्थी आहेत. या सर्व मुलांच्या शैक्षणिक भविष्याचा महत्त्वाचा प्रश्न असून ते शिक्षणापासून वंचित राहता कामा नये. यापूर्वी पालकांनी, स्थानिक ग्रामपंचायतींनी, तसेच स्थानिक लोकप्रतिनिधींनी  आगार प्रमुख यांना वेळोवेळी विनंती केली असून, परंतु त्यांनी त्यांची कुठलीही दखल आपल्या स्तरावरून घेतली गेलेली नाही. तरी विद्यार्थ्यांच्या शैक्षणिक भविष्यासाठी त्वरित बस सेवा सुरू करावी. अन्यथा नांदगांव तालुका राष्ट्रवादी काँग्रेस पक्षाच्यावतीने तीव्र आंदोलने छेडण्यात येतील व त्यांच्या होणाऱ्या परिणामास आपण जबाबदार असाल याची नोंद घ्यावी. असा ईशारा मा. आगार प्रमुख, राज्य परिवहन महामंडळ आगार, नांदगाव यांना देण्यात आला. यावेळी राष्ट्रवादी काँग्रेस तालुका अध्यक्ष विजुभाऊ पाटील, युवक अध्यक्ष सोपान पवार, सोशल मीडिया अध्यक्ष वाल्मिक टिळेकर, महात्मा फुले समता परिषद अध्यक्ष अशोक पाटील,दत्तू पवार, दारासिंग भिडे, बाळासाहेब देहाडराय,अरूण अप्पर,डगळे सर, देशमुख सर,सनी पवार इ. पदाधिकारी व कार्यकर्ते उपस्थित होते.