राज्यातील इतर मागासवर्गीयांची जातीनिहाय जनगणना करावी -समता परिषदेची मागणी
सा.शनैश्वर टाइम्स वृत्तसेवा
नांदगाव - संतोष कांदे
बिहार राज्यात ज्या प्रमाणे जातीनिहाय जनगणना सुरु करण्यात आली आहे,त्या धर्तीवर महाराष्ट्रातील इतर मागासवर्गीय जनसमुदायाची ही स्वतंत्र जातीनिहाय जनगणना करण्यात यावी.अशी मागणी अखिल भारतीय महात्मा फुले समता परिषदेने केली आहे.
तहसीलदार सिद्धार्थ मोरे यांना दिलेल्या निवेदनात पुढे म्हटले आहे की,नुकतीच बिहार मध्ये स्वतंत्रपणे जातनिहाय जनगणना सुरु झाली आहे. तामिळनाडू, छत्तीसगड आणि इतर अनेक राज्यांनी सुद्धा ओबीसी जनगणना केल्या असून त्यांच्या राज्याच्या विकासासाठी त्यांचा उपयोग झालेला आहे. महाराष्ट्रातही जातनिहाय जनगणना करण्याबाबतची अखिल भारतीय महात्मा फुले समता परिषदेची गेल्या कित्येक वर्षांपासूनची मागणी प्रलंबित आहे. जनगणना हा विषय केंद्र शासनाशी संबंधित आहे. मात्र इतर मागासवर्गाची स्वतंत्र जनगणना करण्यासाठी केंद्र सरकारने असमर्थता व्यक्त केली आहे. त्यामुळे राज्य शासनाने बिहार सरकारप्रमाणे ओबीसींची स्वतंत्र जनगणना करावी.
देशातील अनुसुचित जाती व जमातींची जातवार जनगणना करून दीडशे वर्षे होत आलेली आहे. स्वातंत्र्यानंतर भारत सरकारने फक्त अनुसुचित जाती व जमाती यांची जातनिहाय तर इतर सर्वांची एकत्रित गणना करण्याचे धोरण स्विकारले. यातुन मागासवर्गीय ओबीसी वंचित राहिले. सन १९९४ साली केंद्र सरकारने नियुक्त केलेल्या राष्ट्रीय मागासवर्ग आयोगाने ओबीसी जनगणना कशी आवश्यक आहे ते सरकारला तिसऱ्यादा पटवून दिले. सन २०१० च्या ५ मे ला संसदेत राष्ट्रवादीचे नाशिकचे तत्कालीन संसद सदस्य समीर भुजबळ, स्व.गोपीनाथराव मुंडे यांचेसह १०० खासदारांनी ओबीसी जनगणनेचा ठराव केला. त्यासाठी राज्याचे माजी उपमुख्यमंत्री छगन भुजबळ यांनी स्वत: मा.शरद पवार साहेब यांच्या नेतृत्वाखाली सर्वपक्षीय प्रयत्न केले होते. त्यातुन २०११ ते २०१४ मध्ये केंद्राने सामाजिक व आर्थिक जातगणना (SECC 2011) केली. मात्र त्याची आकडेवारी राज्यांना दिली नाही.
यावेळी राष्ट्रवादी काँग्रेसचे तालुकाध्यक्ष विजय पाटील,शहर अध्यक्ष अरुण पाटील,नगरसेवक वाल्मिक टिळेकर,मुकुंद खैरनार,आदीसह राष्ट्रवादी व समता परिषदेचे पदाधिकारी व शेकडो कार्यकर्ते उपस्थित होते.
Comments
Post a Comment