कांदा अनुदान -: प्रतिज्ञापत्र साध्या कागदावर घ्यावीत.शेतकऱ्यांना अजून आर्थिक भुर्दंड नको.! अँड.सुरेश आव्हाड

सा.शनैश्वर टाइम्स वृत्तसेवा

नांदगाव -: संतोष कांदे

शासनाच्या कांदा अनुदान योजनेतील विविध अटी पूर्ण करण्यासाठी १०० रुपयांचे मुद्रांक शुल्क आवश्यक केले आहे.त्या ऐवजी ही प्रक्रिया साध्या कागदावर राबवुन कार्यकारी दंडाधिकारी समोर संबंधित शेतकऱ्याची स्वाक्षरी घ्यावी.अशा स्वरूपाची मागणी वेहेळगाव विविध कार्यकारी संस्थेचे संचालक अँड.सुरेश आव्हाड यांनी नांदगाव कृषी उत्पन्न बाजार समितीचे सचिव अमोल खैरनार यांच्याकडे केली आहे.

         

यावेळी अँड.आव्हाड यांनी श्री.खैरनार यांना सुचित केले की,सदर अनुदान योजनेत कुणीही वंचित राहू नये,म्हणून मुद्रांक शुल्क हा पर्याय निवडून संबंधित लाभार्थी शेतकऱ्याची सोय पाहिली जात असली तरी यामुळे मात्र काही विक्रेते यात कुत्रिम तुटवडा निर्माण करून जास्तीचे शुल्क आकारण्याची शक्यता नाकारता येत नाही.तसेच ज्या शेतकऱ्यांनी मुलगा,किंवा अन्य वाहन चालक यांच्या नावे कांदा विक्री केल्याच्या काही नोंदी आढळून आल्याने त्यांनाही मुद्रांक शुल्क आकारून प्रतिज्ञापत्र भरून घेतली जात आहेत.

       अँड.आव्हाड यांच्या मते याची काही आवश्यकता नसून,साध्या कागदावर ही हे चालू शकते.त्यामुळे याबाबत शेतकऱ्यांवर सक्ती करू नये.असेही अँड.आव्हाड यांनी म्हटले आहे.यावेळी भावडू गिते.रवी केदार,अशोक बुरकुल आदी उपस्थित होते.