गड आला पण सिंह गेले....! नांदगाव बाजार समिती निवडणूक विश्लेषण

नांदगाव - संतोष कांदे

  नांदगाव कृषी उत्पन्न बाजार समितीच्या  मोठ्या चुरशीच्या झालेल्या लढतीत विद्यमान आमदार सुहास कांदे यांची सत्ता आली असली तरी पॅनल मधील तीन प्रमुख नेते गारद झाल्याने गड आला पण सिंह गेला अशी गत झाली आहे.

         आणि हा निकाल आमदार सुहास कांदे यांनी आत्मपरीक्षण करावे असा लागला आहे.मालेगाव येथील निकाल पालकमंत्री ना.दादा भुसे यांच्या विरोधात गेल्यानंतर शंकेची पाल चूकचुकली होती.मात्र जो कॅम्प लावला होता.त्यातील जमा मतदार बघून त्यांना पूर्ण बहुमत मिळेल अशीच भावना शिवसेनेच्या गोटात होती.लक्ष्मी दर्शन ही मतदारांना झाले आल्याने यावर विश्वास ठेवला जात होता.

      विद्यमान आमदार सुहास कांदे यांच्या विरोधात पाच माजी आमदार अनुक्रमे अँड.अनिल आहेर,पंकज भुजबळ,संजय पवार,जगन्नाथ धात्रक,राजेंद्र देशमुख यांनी महाविकास आघाडी करून बाजार समितीची निवडणूक लढवली. आणि विद्यमान आमदारांच्या हातात सर्वाधिक ग्रामपंचायती,सोसायट्या असतानाही पॅनल मधील प्रमुख उमेदवार मानल्या गेलेल्या माजी सभापती विलासराव आहेर,विजय इप्पर,मापारी भास्कराव कासार,यांना पराभूत केले.आणि बहुमत मिळूनही विजयाचा आनंद साजरा न करण्याची नामुष्की ओढवली.

       विधानसभेची रंगीत तालीम समजल्या गेलेल्या या निवडणुकीने विरोधकांना मात्र बळ मिळाले आहे.कारण महाविकास आघाडी कडून निवडणूक लढवलेल्या मविप्र चे तालुका संचालक अमित बोरसे,माजी आमदार अँड.अनिल आहेर यांचे पुत्र दर्शन आहेर,यांचा झालेला विजय हा अत्यंत अवघड अशा परिस्थितीत झाला असल्याने त्याला विशेष असे महत्व आहे.मतदारांनी सरसकट पॅनल ला मतदान न करता टाळून मतदान केल्याने नेमकी माशी कुठे शिंकली होती.याचा शोध पराभूत उमेदवार व आमदार सुहास कांदे यांना घ्यावा लागणार आहे.

        तसेच बाजार समितीचे सभापती पद भूषवलेल्या वंजारी समाजातील प्रमुख असलेल्या कै.शंकरराव इप्पर यांचे पुत्र विजय इप्पर यांनाही ही पराभूत व्हावे लागले आहे.ते वंजारी समाजाचा आमदार असताना..! हे ही या निवडणूक निकालाचे वैशिष्ट्ये होय.

        सलग दुसऱ्यांदा सत्ता प्राप्त झाली आहे.गेल्या सात वर्षात बाजार समितीत आमुलाग्र बदल करत बाजार समितीचा नावलौकिक वाढवण्याचे काम झाले आहे.आणि तोच वारसा सुरु ठेवत शेतकरी हिताचे निर्णय घेत कारभार हाकण्यासाठी पुन्हा एकदा संधी मिळाल्याने ह्या संधीचे सोने करण्याची जबाबदारी अप्रत्यक्षरित्या आमदार सुहास कांदे यांच्यावर येऊन पडली आहे.

      दरम्यान आमदार श्री.कांदे यांचे निष्ठावंत अमोल नावंदर हे उमेदवारी करत असतानाही   आमदार श्री.कांदे यांचे खंदे समर्थक गोकुळ कोठारी यांनीही अपक्ष उमेदवारी केली होती.आणि योगायोग असा की,या दोघांना समसमान मते पडली.शेवटी चिठ्ठी काढून अमोल नावंदर यांचा विजय झाला.

 सोसायटी सर्वसाधारण गट

एकनाथ सदगीर ३०२, कैलास पाटील ३१८, समाधान पाटील ३२०, दर्शन आहेर २९८, साहेबराव पगार २९२, जीवन गरुड २९१, सतीश बोरसे ३०४

महिला राखीव

मंगला काकळीज ३५६, अलका कवडे ३५८

इतर मागासवर्ग

अमित बोरसे ३०८

विजभज

पोपट सानप ३३३

ग्रामपंचायत सर्वसाधारण

अनिल वाघ २७६, अर्जुन पाटील ३०७

आर्थिक दुर्बल

दिपक मोरे ३०९

अनुसूचित जमाती

अनिल सोनवणे ३२१

व्यापारी

यज्ञेश कलंत्री २२०, अमोल नावंदर (चिठ्ठी ) १९५

हमाल मापारी

निलेश इपर ६८