शासकीय कांदा अनुदान.... खरे लाभार्थी नियमाच्या कचाट्यात .... तर बोगस होणार लखोपती..!

सा.शनैश्वर टाइम्स वृत्तसेवा

नांदगाव -: संतोष कांदे

शासनाच्या जाचक अटीमुळे जाहीर केलेल्या कांदा अनुदान योजनेतून खरे कांदा उत्पादक शेतकरी वंचित तर बोगस कांदा उत्पादक शेतकरी (? ) मात्र मालामाल होणार असल्याची चर्चा होत आहे.!

    याबाबत नाव न सांगण्याच्या अटीवर अनेक शेतकऱ्यांनी निर्भीड वृत्तपत्र असलेल्या सा.शनैश्वर टाइम्स शी बोलताना सांगितले की,शासनाने प्रति क्विंटल ३५० रुपये अनुदान जाहीर केले.मात्र हे करत असताना जाचक अटी ही टाकून दिल्या.त्यात मग पिक पाहणी अट मग ती खरीप अन लेट खरीप च हवी.! किंवा सातबाऱ्यावर कांदा लागवड हवी.! ,आणि यात विशेष असे की,यंदा पिक पाहणी ही तलाठ्याने केली नाही,कारण शासनाने जाहीर केल्याप्रमाणे ही पिक पाहणी स्वतः शेतकऱ्याने ऑनलाईन नोंदवायची होती.

      ही ऑनलाईन पिक पाहणी करताना अनेक शेतकऱ्यांना शेकडो अडचणी आल्या.स्वतःच्या क्षेत्रात पिक नोंदणी न झाल्याने काही शेतकऱ्यांनी शेजारच्या शेतकऱ्याच्या शेतात जाऊन नोंदणी केली.ती यशस्वी झाली मात्र पिक मात्र त्या शेतातील असल्याचे नोंदणीत नोंद झाले.यामुळे संबंधित शेतकऱ्याच्या शेतात कांदा असताना शेजारच्या शेतातल्या कपाशीची नोंद पिक पाहणीत झाली आहे.

       ज्या दिवशी शासकीय कांदा अनुदान जाहीर झाले.अगदी त्याच दिवसापासून अनेक लबाड कथित शेतकऱ्यांनी याचा फायदा घेण्याच्या उद्देशाने  नांदगाव कृषी उत्पन्न बाजार समितीत एकच ट्रॅक्टर मधील कांद्याची संबंधित व्यापारी,मापारी,कर्मचारी यांची मदत घेऊन एकाच दिवशी चक्क तीन ते चार वेळेस नोंद,लिलाव,काटा करत कांदा अनुदान मध्ये अधिकृत नाव नोंदवले आहे.अशी चर्चा आता होत आहेत.

      या बाबत अनेक शेतकऱ्याने बोलते करण्याचा प्रयत्न केला असता ; आमचे नाव खरे असूनही कांदा अनुदानात आले नाही ,तर त्या बोगस लाभार्थ्यांचा भांडाफोड करू अशी  ; नरो वा कुंजरो भूमिका संबंधित शेतकऱ्यांनी सा.शनैश्वर टाइम्स शी बोलताना जाहीर केली आहे.