पावसाचा हाहाकार.. शेतकरी उघड्यावर....तलाठी,तहसीलदार,अन जिल्हाधिकारी व्यस्त ; मात्र थेट मुख्यमंत्र्यांकडून दखल..!

सा.शनैश्वर टाइम्स वृत्तसेवा

नांदगाव -: संतोष कांदे

आज सायंकाळी सहा वाजेच्या सुमारास झालेल्या गारपीटीने तालुक्यातील जळगाव बुद्रुक येथील दोन शेतकऱ्यांच्या घरांचे पत्रे उडून गेल्याने जवळपास दोन लाखांपेक्षा अधिक रकमेचे नुकसान झाल्याचा अंदाज व्यक्त होत आहे.सुदैवाने जीवितहानी झाली नसली तरी तालुका प्रशासनाचा कोडगेपणा या निमित्ताने उघड झाला आहे.तर या घटनेची माहिती खुद्द मुख्यमंत्री ना.एकनाथ शिंदे यांचे स्वीय सहाय्यक नितीन लालसरे यांनी घेतली.व प्रशासनाला आदेश दिले आहेत.

        आज सहा वाजेच्या सुमारास जळगाव बुद्रुक गाव ,परिसरात वादळ वाऱ्यासह मुसळधार पावसाचे आगमन झाले,काही क्षणातच गारा ही बरसु लागल्याने अनेक वृक्ष जमीनदोस्त झालेत.त्याचबरोबर परिसरातील नवनाथ कांदे,व रमेश मिस्त्री यांच्या घराचे पत्रे या वादळाने उडून दोन्ही कुटुंबं अक्षरशः रस्त्यावर आले आहेत.घराचे पत्रे उडाल्यानंतर घरातील संसारपयोगी वस्तूंचे पावसात भिजून मोठे नुकसान झाले आहे.

      दरम्यान युवा शेतकरी नवनाथ हा गावात स्थानिक बाजार असल्याकारणाने भाजीपाला आणण्यासाठी गेला होता.घरात त्याची सहा महिन्याची मुलगी झोळीत झोपलेली होती.त्याची आई व पत्नी शेतात एका झाडाच्या खाली उभ्या होत्या.पत्रे उडाल्यानंतर या पत्र्यावर ठेवलेला एक भला मोठा दगड या झोळीच्या अगदी जवळ पडला.अन ही बालिका थोडक्यात बचावली.

       तर या घटनेची माहिती तलाठी,तहसीलदार,व जिल्हाधिकारी यांना देण्याचा प्रयत्न केला असता ; संबंधित अधिकाऱ्यांनी फोन उचलला नाही.या बाबत शेतकऱ्यांनी नाराजी व्यक्त केली आहे.