नशीबवान....!

सा.शनैश्वर टाइम्स वृत्तसेवा

नांदगाव - संतोष कांदे

तो एक सामान्य कुटुंबातील एक तरुण.... घरची गरिबी...मात्र घरातील सर्वच सदस्य एकमेकांना सांभाळून या गरिबीचा सामना करत असताना या युवकाला काहीतरी नवीन करू.! अशी उभारी मिळाली.आणि त्याने अल्पशा भांडवलावर एक चारचाकी वाहन घेऊन नांदगाव - वेहेळगाव या मार्गांवर खाजगी प्रवासी वाहतूक सुरु केली.काही दिवस हा व्यवसाय केल्यानंतर मात्र त्याची व्यवसायिक बुद्धी वेगळेच काही करण्याची प्रेरणा देत होती.तेव्हा मग हा व्यवसाय बंद करून याचं गाडीतून चक्क गोळ्या,बिस्किटे ग्रामीण भागातील किराणा दुकानदारांना पोहोच करण्याचे काम सुरु केले.

      ग्रामीण भागातील दुकानदारांनी सुरुवातीला नफा - तोटा याचा विचार करत नकारघंटा वाजवली.मात्र हा तरुण हिंमत हरला नाही.त्याने त्याचे प्रयत्न सुरूच ठेवले.आणि मग हळूहळू दुकानदार त्याच्याकडून ह्या वस्तू घेऊ लागले.अन मग अल्पावधीत या गाडीवर अजून किराणा सामान वाढवून तो मोठ्या उमेदीने ह्या व्यवसायात उतरला.

       आणि बघता - बघता या व्यवसायात त्याचा चांगला जम बसला.चांगले भांडवल हाताशी आले.यावर त्याने नांदगाव शहरातील डॉ. आंबेडकर चौकात एक भाड्याचा गाळा घेऊन होलसेल किराणा सुरु केला.ग्रामीण भागातील दुकानदारांना प्रथमच इतक्या कमी भावात जास्त नफा कमविण्याचा मार्ग ह्या तरुणाने उपलब्ध करून दिल्याने या तरुणाचा हा प्रयत्न प्रचंड यशस्वी ठरला.

      यानंतर त्याने मागे वळून बघितले नाही.तालुक्यातील सर्वच किराणा दुकानदाराशी संपर्क स्थापित झाल्याने सर्वच दुकानदार या तरुणाकडे आकर्षित झाले.आणि मग मात्र या गरीब कुटुंबाचे भाग्य पालटले. आणि हे सर्व करत असताना अनेक गरीब दुकानदार,गरीब कुटुंबाना पैसे नसताना ही सांभाळून घेण्याची वृत्ती यामुळे त्यांचा व्यवसाय अल्पावधीत तालुका भरात अत्यंत लोकप्रिय झाला.

          तालुक्यातील मूळडोंगरी या गावी छोटीशी शेती घेऊन त्या गावाचे रहिवासी झाले.आणि त्याच गावात या तरुणाची आई लोकांच्या आग्रहास्तव ग्रामपंचायत निवडणूक लढली.अन थेट उपसरपंच ही झाली.त्यानंतर थेट लोकांमधून निवडून येऊन सरपंच झाली.या सरपंच पदाच्या कार्यकाळात या तरुणाने आमदार सुहास कांदे यांच्या माध्यमातून कोट्यावधी रुपयांची विकासकामे साकारली.

        मात्र या तरुणाचे यश काही हितचिंतकांना सहन झाले नाही.दुसऱ्या पंचवार्षिक निवडणुकीत या तरुणाला अपयशाचा सामना करावा लागला.पण यावर तो खचून गेला नाही.आणि तो पुन्हा नव्या जोमाने कामास लागला.अन काय चमत्कार तो नुकत्याच झालेल्या नांदगाव बाजार समिती निवडणुकीत व्यापारी गटातून नशिबाने निवडून आला.

       नशीब यासाठी की, या तरुणाला अन प्रतिस्पर्धी उमेदवाराला सम - समान मते पडली.मात्र एका लहान बालकाच्या हातून चिठ्ठी काढण्यात आली.अन या तरुणाचे नाव निघाले.या नशीबवान तरुणाचे नाव आहे.... अमोल नावंदर... आणि त्याला ही संधी उपलब्ध करून देणारे आमदार म्हणजेच सुहास कांदे....

       आणि या प्रयत्नात त्यांना त्यांचे वडील प्रकाशचद्र ,आई मंगला ताई, भाऊ अमित यांचे मोलाचे सहकार्य व खंबीर पाठींबा मिळत असतो.हे आवर्जून नोंद करावे लागेल.