केंद्र व राज्य शासनाकडून जनतेची कुचेष्टा.!

.शनैश्वर टाइम्स वृत्त

सेवा

नांदगाव - संतोष कांदे

गॅस वरील सबसिडी बंद.....पेट्रोल ,डिझेल चे भाव आवाक्याबाहेर...... शेतकऱ्यांना कृषी सन्मान योजनेचे पैसे मिळेनात.....विद्यार्थ्यांना शिष्यवृत्ती बंद.... एक ना अशा अनेक लोकल्याणकारी योजनांचा विद्यमान केंद्र व राज्य शासनाकडून फायदा मिळत नसल्याने सर्वसामान्य जनता संभ्रमित झाल्याचे चित्र दिसून येत आहे.

      काँग्रेस शासनाच्या काळात देशात राज्यात ज्या काही लोक हिताच्या धोरणात्मक योजना सुरु करण्यात आल्या होत्या.त्यात काही बदल तसेच अनेक नव्या योजना विद्यमान शासनाने ही सुरु केल्या होत्या.मात्र मधल्या काळात कोरोना आला.अन त्यावेळी बिकट परिस्थिती उद्धभवली. त्यामुळे या सर्व योजनांना ब्रेक लागला.आणि यावर जनतेने ही परिस्थिती समजून घेत यावर ब्र शब्द काढला नाही.मात्र कोरोना आटोक्यात आल्यानंतर सर्व परिस्थिती पूर्व पदावर आली.मात्र जनहिताच्या ज्या काही योजना बंद करण्यात आल्या.त्या पुन्हा सुरु करून जनतेला दिलासा देणे गरजेचे असताना याकडे जाणीवपूर्वक दुर्लक्ष होत असल्याचे नागरिकांचे म्हणणे आहे.

      यापूर्वी घरगुती गॅस घेतल्यानंतर सबसिडी ची जी काही रक्कम असेल ती बँक खात्यावर जमा होत होती.मात्र दर वाढूनही सबसिडी दिली जात नसल्याने ह्या वाढीव रकमेचा भुर्दंड जनतेला सोसावा लागत आहे.विद्यार्थ्यांना महाविद्यालयीन शिक्षण घेत असताना एक हजार दोन हजार अशी शिष्यवृत्ती मिळत होती.त्यामुळे गोरगरीब पालकांना मोठा दिलासा मिळत होता.मात्र तीन वर्षांपासून फक्त शिष्यवृत्तीचे फार्म भरून घेतले जातात.पैसे मात्र येत नाही.त्याच बरोबर मुलींना बारावी पर्यंत मोफत शिक्षण,प्रवास असल्याचा नियम असताना ही प्रत्येक शाळा,विद्यालय,महाविद्यालय विद्यार्थिनींकडून सर्रास फी वसूल करत आहेत.याकडे सर्वांचेच दुर्लक्ष होत असल्याचे दिसून येत आहे.

         विद्यमान शासनाने शेतकऱ्यांना वर्षांकाठी सहा हजार रुपये देणे सुरु केले होते.एक वर्षापर्यंत ही रक्कम बँक खात्यावर जमा ही होत होती.मात्र गेल्या वर्षांपासून ही रक्कम तसेच सध्याच्या राज्य शासनाने त्यात सहा हजार रुपये देण्याची घोषणा केली होती.ते हि पैसे शेतकऱ्यांना अजून मिळाले नाहीत.गेल्या वर्षी अतिवृष्टीने शेतकऱ्यांचे जे नुकसान झाले,त्याचे फक्त पंचनामे झालेत.भरपाई मात्र दुसरा हंगाम सुरु झाला तरी मिळालेली नाही.

     कांदा अनुदान जाहीर झाले.जाचक अटी घालण्यात आल्या.त्या पूर्ण केलेल्या शेतकऱ्यांनाही अजून अनुदान रक्कम मिळालेली नाही.जीवनावश्यक वस्तूंची महागाई आकाशाला भिडली आहे.त्याचे कुणालाच सोयीरसुतक नसल्याचे दिसून येत आहे.एकंदरीत सर्वच पातळीवर सर्वसामान्य जनतेची ससेहोलपट सुरु असल्याचे दिसून येत आहे.