दृष्काळी आढावा बैठकीत इतर समस्यांचाच उहापोह.! आमदार कांदे वगळता दृष्काळाच्या गांभीर्यापासून सर्वच अनभिज्ञ.!

सा.शनैश्वर टाइम्स वृत्तसेवा

नांदगाव -: संतोष कांदे

वरूणराजा रुसल्याने तालुक्यातील पिकांची दयनीय अवस्था झाली आहे.एकरी तीस ते चाळीस हजार रुपये खर्च करून खरीपाची सांगड घातलेल्या बळीराजासमोर या अस्मानी संकटाला कसे तोंड द्यावे असा यक्षप्रश्न उभा राहिला आहे.आणि यासाठी लोकप्रतिनिधी नात्याने आमदार सुहास कांदे यांनी दृष्काळाची चिन्हे ओळखून यावर भविष्यात काय उपाययोजना करता येईल,यास्तव आयोजित केलेल्या बैठकीत इतर समस्यांचा अधिक मारा झाल्याने या महत्वपूर्ण बैठकीचे गांभीर्य हरवल्याचे दिसून आले.

         शिवनेरी विश्रामगृहाच्या सभागृहात दृष्काळ पडलाच ; तर काय काय उपाययोजना करता येईल.? याकरिता आमदार सुहास कांदे यांनी तालुक्यातील सर्व प्रमुख शासकीय अधिकाऱ्यांची बैठक आयोजित केली होती.या बैठकीला तहसीलदार,गटविकास अधिकारी,पोलीस निरीक्षक,यांच्यासह जलसंपदा, वन,भूमिअभिलेख,पशुवैद्यकीय,आरोग्य,महिला व बालविकास,वीज वितरण कंपनी,नगरपालिका  व अन्य सर्व विभाग आमंत्रित करण्यात आले होते.या बैठकीच्या सुरुवातीला आमदार कांदे यांनी एक लोकप्रतिनिधी म्हणून त्यांना जे-जे शक्य होईल,ते सर्व करण्याचा शब्द दिला.

          यानंतर मात्र तालुक्यातून आलेल्या काही नागरिकांनी दृष्काळ वगळता इतर समस्या सांगणे सुरु केल्याने दृष्काळावर बोलावलेली बैठक अखेर पर्यंत भरकटत राहिली.अधुन- मधून आमदार कांदे ती पूर्वपदावर आणण्याचा प्रयत्न करताना दिसत होते.

      आमदार कांदे यांनी सर्व विभागप्रमुखांना आगामी दृष्काळाची चाहूल लक्षात घेऊन धरणातील उपलब्ध पाणी साठ्याचे जतन,जनावरांसाठी पाणी व चारा छावण्यांचे नियोजन,नागरिकांच्या आरोग्य साठीची उपलब्धता यासाठी सज्ज राहण्याच्या सूचना केल्या.