बँकांनी शेतकऱ्यांप्रती आदराची भावना ठेवावी...! आमदार कांदे यांच्याकडून बँकांना ताकीद

सा.शनैश्वर टाइम्स वृत्तसेवा

नांदगाव -: संतोष कांदे

तालुक्यातील अनेक राष्ट्रीयकृत बँकांमध्ये अधिकारी व कर्मचारी फक्त मोठ्या म्हणजेच आर्थिकदृष्ट्या सक्षम ग्राहकांनाच चांगली वागणूक देतात.कर्ज मागणाऱ्या छोट्या शेतकऱ्यांना व सामान्य नागरिकांना कमी लेखून त्यांच्याशी व्यवहार करतात.यास्तव आज आमदार सुहास कांदे यांनी बँकेच्या अधिकाऱ्यांचे चांगलेच कान टोचले.

             आज शिवनेरी शासकीय विश्रामगृह येथील बाळासाहेब ठाकरे सभागृहामध्ये आमदार सुहास कांदे यांनी सर्व राष्ट्रीयकृत बँक अधिकाऱ्यांची विविध विषयांवर बैठक घेतली.गेल्या अनेक दिवसांपासून नांदगाव मधील बँक कर्मचारी ग्राहकांना योग्य मार्गदर्शन करत नाही, सहकार्य करत नाही किंवा उद्घटपने वागतात अशा तक्रारी आमदार संपर्क कार्यालयात आल्या होत्या.त्या अनुषंगाने ही बैठक बोलावण्यात आली होती.

         

 या वेळी उपस्थित सर्व बँक मॅनेजर यांना सद्यपरिस्थिती पाहता ग्रामीण भागातील शेतकरी बांधवांना कर्ज प्रकरण असो वा इतर काहीही काम असो आपण सहकार्याची भूमिका घेऊन काम करावे अशी सूचना केली. आपण कर्मचारी आहात आणि गाव आमचे आहे तेंव्हा आपण सामंजस्य घेऊन प्रत्येक ग्राहकाला समजून घ्या त्याला मदत करा असे आवाहन केले. ग्राहकांना त्रास होईल असे कोणी कर्मचारी वागत असेल तर त्याला तशी ताकीद द्या असे या वेळी सांगितले. 

    या बैठकीत स्टेट बँक, महाराष्ट्र बँक, बँक ऑफ बडोदा, महारष्ट्र ग्रामीण बँक, एच डी एफ सी बँक, युनियन बँक आदी बँकेचे मॅनेजर यावेळी उपस्थित होते.