सुधारित आणेवारी जाहीर करून ; दृष्काळी उपाययोजना सुरु कराव्यात.! माजी आमदार अँड.अनिल आहेर

सा.शनैश्वर टाइम्स वृत्तसेवा

नांदगाव -: वार्ताहर

अत्यल्प पाऊस पडलेल्या नांदगाव तालुक्यात जास्तीची आणेवारी लादून प्रशासनाने ऐन दृष्काळात शेतकऱ्यांच्या जखमेवर मीठ चोळले आहे.तरी सुधारित आणेवारी जाहीर करण्याची मागणी माजी आमदार अँड.अनिल आहेर यांनी जिल्हाधिकाऱ्यांकडे केली आहे.

       उपजिल्हाधिकारी भीमराज दराडे यांना दिलेल्या निवेदनात पुढे असे म्हटले आहे की, तालुक्यात अत्यंत कमी पाऊस झाल्याने तालुक्यात दुष्काळी परिस्थिती निर्माण झाली आहे. त्यातच प्रशासनाने काढलेली प्राथमिक पीक नजर आणेवारी त्या त्या गावाच्या ग्रामसमितीला विश्वासात न घेता काढली आहे.तालुक्यातील शेतकरी दुष्काळी परिस्थितीशी मुकाबला करीत असताना तालुक्यातील शासकीय यंत्रणा मात्र गांभीर्याने बघत नसल्याचा आरोप ही अँड.आहेर यांनी केला आहे.

      प्राथमिक नजर आणेवारी ही कमी करण्यात यावी ,तालुक्यात तीव्र पाणीटंचाई निर्माण झालेली आहे, जनावरांना चारा नाही,शेतकऱ्यांना कुठलेही उत्पन्न नाही, त्यामुळे पीक कर्ज व वीजबील शंभर टक्के माफ करावे, पशुधन वाचविण्यासाठी तत्काळ  तालुक्यात चारा छावण्या सुर कराव्यात , पिण्यासाठी पाणी टँकर सुरू करण्यात यावे, पीक विम्याची अग्रिम २५ टक्के रक्कम तत्काळ शेतकऱ्यांच्या खात्यावर जमा करण्यात यावी,मागील वर्षाचे मार्च व एप्रिल महिन्यात झालेल्या गारपिटीचे अनुदान शेतकऱ्यांच्या खात्यावर त्वरीत वर्ग करण्यात यावे.

      यावेळी काँग्रेस नांदगाव तालुकाध्यक्ष हरेश्वर सुर्वे, मनमाड बाजार समितीचे संचालक डॉ. पुंजाराम आहेर, रामदास पाटील, कैलास गायकवाड, उदय पाटील, धनंजय काळे, अरुण निकम, विनोद पवार, नवनाथ बोरसे, निरंजन आहेर, सागर साळुंके, पुंडलिक सदगीर आदी काँग्रेसचे कार्यकर्ते उपस्थित होते .