नांदगावचा दृष्काळी तालुक्यात समावेश न झाल्याने कांदेंचा राजीनामा.! प्रदेशाध्यक्ष बावनकुळे कडे पाठवला राजीनामा

सा.शनैश्वर टाइम्स वृत्तसेवा

नांदगाव -: संतोष कांदे

नांदगाव तालुका दुष्काळग्रस्त जाहीर न झाल्याच्या निषेधार्थ तालुक्यातील  जळगाव बुद्रुक येथील भाजपाचे बुथ प्रमुख नवनाथ कांदे यांनी पदाचा राजीनामा प्रदेशाध्यक्ष चंद्रशेखर बावनकुळे यांना ईमेल द्वारे पाठविला असून सरकारला घरचा आहेर दिला आहे.

   नाशिक जिल्ह्यात सर्वात कमी पाऊस नांदगाव तालुक्यात झाला असून शासनाच्या सर्वच निकषांवर तालुका उतरत असताना देखील नांदगाव तालुक्याला डावलल्याने नाराज झालेल्या भारतीय जनता पार्टीच्या जळगाव बुद्रुक येथील बुथ प्रमुख नवनाथ कांदे यांनी पदाचा राजीनामा प्रदेशाध्यक्ष चंद्रशेखर बावनकुळे यांना ईमेल द्वारे पाठविला आहे.

यामध्ये म्हटले आहे की, 

नांदगाव तालुका भीषण दुष्काळ व पाणी टंचाईस सामोरा जात आहे. येथील शेतकऱ्यांची परिस्थिती दयनीय आहे तसेच येथील सर्व उद्योग धंदे हे शेतीवर अवलंबून असल्याने तालुक्यात दुष्काळाची परिस्थिती अत्यंत गंभीर आहे. असे असतानाही नुकत्याच जाहीर झालेल्या दुष्काळग्रस्त तालुक्यांच्या यादीत नांदगाव तालुक्याचे नाव समाविष्ट नाही याचा निषेध म्हणून मी बुथप्रमुख या पदाचा राजीनामा देत आहे. त्याचबरोबर तालुक्यातील अनेक वृद्ध पदाधिकारी देखील राजीनामा देण्याच्या तयारीत आहेत. तरी नांदगाव तालुका दुष्काळग्रस्त तालुक्यांच्या यादीत समाविष्ट झाला पाहिजे असे म्हटले आहे.

दरम्यान 

खरीप हंगाम २०२३-२४ मध्ये नांदगाव तालुक्यात प्रधानमंत्री पीकविमा योजनेंतर्गत हंगामातील प्रतिकूल परिस्थितींतर्गत सर्वेक्षण करण्यात आले होते. त्यानुसार नांदगाव तालुक्यातील सर्व आठही महसूल मंडळांमध्ये नजर अंदाज सर्वेक्षणानुसार अपेक्षित सरासरी उत्पादकता २५ टक्क्यांपेक्षा कमी आली होती. म्हणजेच पिकांचे होणारे नुकसान हे ७५ टक्क्यांपेक्षा जास्त होणार असल्याचे दिसून आले होते. बहुतेक पिकांखालील क्षेत्र पाण्याअभावी करपले होते.

तालुक्यात ऑगस्टमध्ये चार आठवड्यांपेक्षा जास्त पावसाचा खंड पडल्याने खरीप हंगामात प्रतिकूल परिस्थिती निर्माण होऊन पिकांचे मोठे नुकसान झाले. मात्र, मदत व पुनर्वसन विभागाने त्याकडे दुर्लक्ष केले आहे.