तालुका दृष्काळी जाहीर करण्यासाठी आमरण उपोषण..! - महेंद्र बोरसे

सा.शनैश्वर टाइम्स वृत्तसेवा

नांदगाव -: संतोष कांदे

राज्यातील जे ४२ तालुके दृष्काळी म्हणून जाहीर करण्यात आले.त्यात नांदगावचा समावेश नाही.हा अन्याय असून,शेतकरी हितासाठी येत्या २ नोव्हेंबर पासून तहसील कार्यालयासमोर आमरण उपोषण करण्याचा निर्णय राष्ट्रवादी काँग्रेसचे तालुकाध्यक्ष महेंद्र बोरसे यांनी घेतला आहे.

        तहसीलदारांना दिलेल्या निवेदनात श्री.बोरसे यांनी शेतकऱ्यांसाठी ११ प्रमुख मागण्या केल्या आहेत.त्या मागण्यांची पूर्तता होईपर्यंत आमरण उपोषण करण्यावर बोरसे ठाम राहणार आहेत.

        तालुक्यातील खरीप हंगाम -२०२३ हा अवर्षणामुळे वाया गेला असुनही तालुक्याचा समावेश ट्रिगर -२ अंतर्गत घोषित ४२ तालुक्यात नसल्याने तालुका दुष्काळग्रस्त जाहीर होण्याची शक्यता जवळपास मावळली आहे. प्रसार माध्यमातील बातमीनुसार राज्य कृषि विभागाने शासनाकडे पाठविलेल्या दुष्काळग्रस्त ४२ तालुक्यांच्या यादीत नांदगांवचा समावेश नसल्याचे समजते, त्यामुळें शेतकरी वर्ग आणि सर्वसामान्य जनता आणि एकूणच सर्व बाजारपेठ हवालदील झाली आहे.