अंगणवाडी सेविकांच्या संपामुळे कुपोषण वाढीस लागण्याची भिती.! तुटपुंज्या मानधनामुळे आली संपाची वेळ...

सा.शनैश्वर टाइम्स वृत्तसेवा

नांदगाव -संतोष कांदे

कोरोना काळात जीवावर उदार होऊन कर्तव्य बजावलेल्या अंगणवाडी सेविकांच्या समस्या,अडचणींकडे केंद्र व राज्य शासनाचे सातत्याने दुर्लक्ष होत असल्याचे दिसून येते.पूर्णवेळ जबाबदारीचे काम करूनही त्यांना अत्यल्प मानधनावर समाधान मानावे लागत असल्याने या विरोधात राज्यातील सर्व अंगणवाडी सेविका येत्या ४ डिसेंबर पासून बेमुदत संपावर जात असल्याचे निवेदन त्या -त्या प्रकल्पात दिले आहे.

      या अंगणवाडी कर्मचाऱ्यांकडून महिला बालविकास विभागासह आरोग्य विभाग,पंचायत समिती,ग्रामपंचायत,शिक्षण विभाग,महसूल विभाग,ही आपापापली कामे नेहमी करून घेत असतात.आरोग्य विभागाने तर कोरोना च्या जीवघेण्या साथीत याचं अंगणवाडी सेविकांना घरोघर पाठवून कोरोना ग्रस्तांचा सर्वे करून घेतला होता.त्यावेळी अनेक अंगणवाडी सेविकांना प्राणास मुकावे लागले होते.

        पूर्णवेळ काम करूनही राज्य शासनाच्या चतुर्थ कर्मचाऱ्यांच्या वेतनापेक्षा अत्यंत कमी मानधन त्यांना सध्या दिले जात आहे.या अंगणवाडी सेविकांना किमान २५ हजार मानधन अपेक्षित आहे.आदिवासी कुटुंबंांचे प्रबोधन करून त्यांना शासनाच्या सर्व आरोग्यविषयक सवलती,फायदे मिळवून देण्यात या अंगणवाडी सेविकांचे मोठे योगदान आहे.तसेच कुपोषणाचे प्रमाण कमी करणे,सर्व लसीकरण,आधार कार्ड काढून घेणे,त्याचबरोबर पोलिओ निर्मूलनात ही अंगणवाडी सेविकांचा सिंहाचा वाटा आहे.या रास्त मागण्याबाबत राज्य शासन गंभीरपणे विचार करतील.अशी आशा या सेविकांना लागली आहे.

       नांदगाव प्रकल्पात प्रकल्पाधिकारी प्राची पवार यांना अंगणवाडी सेविकांनी बेमुदत संप पुकारत असल्याचे निवेदन सादर केले यावेळी तालुकाध्यक्ष श्रीमती मिरा राठोड,उपाध्यक्षा सौ.पूनम शिंदे,बिट अध्यक्षा सौ.मंगल कांदे,वाल्ह्याबाई घुगे,सौ.भारती आहेर,श्रीमती विजया बोरसे आदी उपस्थित होत्या.