नांदगावच्या दृष्काळाचा एव्हेंट.....पण फलित काय.?

विशेष बातमी

सा.शनैश्वर टाइम्स वृत्तसेवा

नांदगाव -संतोष कांदे

नांदगावच्या दृष्काळाची भीषणता गंभीर आहेच ; पण त्यावरून तालुक्यात 'आम्ही किती जनतेचे कैवारी असा जो अविर्भाव आणला जात आहे.त्यामुळे दृष्काळ चेष्टेचा विषय बनू नये.अशी दृष्काळाने पिडलेल्या शेतकऱ्यांची सार्वत्रिक भावना आहे.

      अनेक वर्षानंतर अशी परिस्थिती तालुक्यावर ओढवली आहे.नाहीतर कांदा पिकाच्या जोरावर येथील अनेक शेतकऱ्यांचा झोपडी ते बंगला असा प्रवास झाला आहे.यंदा मात्र या दृष्काळामुळे शेतकऱ्यांच्या आर्थिक विकासाला करकचून ब्रेक लागला आहे.

      दरवर्षी भरणारे तलाव,विहिरी,बंधारे कोरडेच आहेत.नद्यांच्या नशिबी एकही पूर आला नाही.पोळा सणाला सर्जा - राजाला बादलीत पाणी घेऊन स्नान घालावे लागले.मनसोक्त डुंबंण्याचा त्यांचा आनंद पावसाने हिरावून घेतला.गणपती,नवरात्रीला पाऊस येतो असा ठोकताळा ही यंदा खोटा ठरला.मका म्हणजे कमी खर्चात अधिक उत्पन्न देणारे नगदी पिक...त्याच्यावर आशा ठेवून कोरडवाहू शेती करणाऱ्या शेतकऱ्यांच्या पदरात उभे मका पिक दीड ते दोन हजारात मेंढपाळाच्या हवाली करताना काय वेदना झाल्या असतील.? याचा विचारच न केलेला बरा.! 

    आणि अशी परिस्थिती असताना प्रशासन मात्र कागदी घोडे नाचवण्यात धन्यता मानत होते.त्यामुळे नांदगावला दृष्काळ असतानाही जाहीर होऊ शकला नाही.आता मात्र शेती संबंधित सर्वच प्रशासकीय विभाग जागे झाले आहेत.चुका लपवण्यासाठी ते बळीचा बकरा शोधतील यात काही शंका नाही.

      यावर कडी केली आहे ती राजकीय पक्षांनी शेतकऱ्यांचे आम्हीच कसे कैवारी असे दाखवण्याची अहमिका लागली आहे.राज्यात सत्तेवर असलेल्या नेत्यांचा पक्ष,ज्यांचा शब्द खुद्द पंतप्रधान मोडत नाही असा पक्ष,आणि ज्यांच्या शब्दाला मुख्यमंत्र्यांच्या दरबारीं मान आहे.असे सर्वच दृष्काळ जाहीर व्हावा यास्तव जीवाचे रान करत असल्याचे चित्र सध्या तालुका बघतोय.

       मार्च - एप्रिल मध्ये झालेल्या गारपीट चे अनुदान खरीप उलटून गेले तरी अजून मिळाले नाही.त्यावर आजपर्यंत कुणीच ब्र शब्द ही काढला नाही.मात्र २०२४ च्या निवडणुका डोळ्यासमोर असल्याने आता सर्वांना शेतकऱ्यांविषयी पुतणा मावशीचे प्रेम उफाळून आले आहे.

    एकंदरीत दृष्काळ जाहीर व्हावा,तालुक्यातील शेतकऱ्यांना दिलासा मिळावा....श्रेय कुणीही घ्या.! अशी शेतकऱ्यांची भावना आहे.