ओव्हरटेक करण्याच्या नादात कंटेनर खाली सापडून दोघांचा मृत्यू..! कासारी गावावर शोककळा.

 सा.शनैश्वर टाइम्स वृत्तसेवा

नांदगाव - संतोष कांदे

   नांदगाव तालुक्यातील साकोरा गावात  वेहळगांव रस्त्यावर आज रविवारी सायंकाळी कंटेनरला ओव्हरटेक करण्याच्या  नादात मागच्या चाकाखाली सापडून दोघांचा जागीच मृत्यू झाला तर एक जण अत्यवस्थ अवस्थेत असून त्याला उपचारासाठी रूग्णालयात पाठवण्यात आले आहे.

  याबाबत सविस्तर वृत्त असे की,आज सायंकाळी साडेसहा वाजेदरम्यान साकोरा वेहळगांव रस्त्यावर नांदगाव कडे जाणाऱ्या एसटी बसला चुकीच्या दिशेने  एम.एच.४१बी.जे.९९७८ टीव्हीएस स्टार  मोटारसायकल वर  तिघे जण  ओहरटेक करून पुन्हा पुढे जात असलेल्या

एच आर ३८ए.सी.६०५९ कंटेनरला ओहरटेक करतांना मोटारसायकलचा बॅलन्स चुकल्याने मागील चाकाखाली आल्याने अतुल ज्ञानेश्वर पवार (३०), नितीन उत्तम पवार (३०),या दोघांचा जागीच मृत्यू झाला तर योगेश सुदाम राठोड(२८) हा गंभीर जखमी झाला असून त्याला उपचारासाठी रूग्णालयात दाखल करण्यात आले. यावेळी प्रत्यक्षदर्शी नागरीकांनी अपघात झाल्याचे पाहिल्याचे सांगितले .याप्रकरणी नांदगाव पोलिस स्टेशनचे पी.आय.प्रितम चौधरी यांचे मार्गदर्शनाखाली ए पी आय एस आर बढे,पी एस आय वाघमारे ,पो.सि.सोनवणे, श्रीखंडे,व खामकर आदींनी येवून पंचनामा करून अधिक तपास करीत आहेत.यावेळी नागरीकांनी गर्दी केल्याने एक तास वाहतूक ठप्प झाली होती.