पुतळ्यांचा जीर्णोद्धार करून सामाजिक अस्मिता जपण्याचा आ.सुहास कांदे यांचा स्तुत्य प्रयत्न.!

सा.शनैश्वर टाइम्स वृत्तसेवा

नांदगाव -: संतोष कांदे

मतदार संघातला महत्वाचा मात्र गेल्या कैक वर्षांपासून रेंगाळत असलेला पाणीप्रश्न सोडवण्यावर लक्ष केंद्रित करून ते काम अंतिम टप्यात असतांनाच शहर व ग्रामीण भागातील विविध धर्माचे पूज्यस्थान असलेल्या धार्मिक स्थळांचाही विकास करून आमदार सुहास कांदे यांनी जनतेची सामाजिक अस्मिता जपण्याचा जो प्रयत्न चालवला आहे.तो कौतुकास पात्र ठरत आहे.

    नांदगाव,मनमाड नगरपालिका क्षेत्रातील नागरिकांसाठी पाणीप्रश्न महत्वाचा व अनेक निवडणुकांमध्ये कळीचा मुद्दा होता.तो करंजवण पाणीपुरवठा योजना व गिरणा धरण पाणी योजनेच्या माध्यमातून सुटल्यात जमा आहे.ग्रामीण भागातील ग्रामस्थांसाठी ७८ खेडी योजना स्वतंत्र करून ते काम ही ८० टक्याच्या पुढे गेले आहे.

       ही सर्व विकासकामे होत असताना त्या -त्या जाती धर्माच्या लोकांच्या मनात आपल्या देवता,थोर महापुरुष यांच्याबद्दल कमालीचा आदरभाव असतो.त्या बाबत त्यांच्या भावना आज तितक्याच नाजूक असतात.ही बाब हेरून आ.श्री.कांदे यांनी महाराष्ट्राचे आराध्यदैवत छत्रपती शिवाजी महाराज यांच्या स्मारक व पुतळ्याचा जीर्णोद्धार केला.त्या साठी त्यांनी थेट महाराजांचे वंशज संभाजीराजे छत्रपती यांना आणले होते.

      मनमाड शहरात घटनेचे शिल्पकार डॉ. बाबासाहेब आंबेडकर यांच्या पूर्णकृती पुतळ्याचा जीर्णोद्धार करताना आंतरराष्ट्रीय प्रसिद्धीस पावलेले भदंत पू.डॉ.राहुल बोधी यांना बोलावले होते.व पुतळ्यावर विमानातून पुष्पवृष्टी करण्याचा प्रसंग तर काळजात कोरून ठेवावा,असा होता.

    स्वतः अशिक्षित असताना ही अजरामर साहित्य निर्मिती केलेल्या शाहीर अण्णाभाऊ साठे यांचे ही स्मारक उभारून मातंग समाजाच्या थेट हृदयात स्थान मिळवण्याचा मान प्रथमच आ.सुहास कांदे यांना मिळाला आहे.त्याचबरोबर अहिंसा चौक उभारून जैन समाजाच्या मनात ही त्यांनी आपले वेगळे स्थान निर्माण केले आहे.तर याचवेळी हुतात्मा स्मारकाचे सुशोभीकरण करण्यास ते विसरले नाहीत.

       छत्रपती शिवाजी महाराज यांच्या अतुलनीय कार्याची माहिती पुढच्या पिढीला सतत होत रहावी,म्हणून शिवसृष्टीची निर्मिती चे काम ३० टक्के च्या पुढे आहे.तिच गत राजमाता अहिल्यादेवी होळकर यांच्या पुतळ्याच्या कामाबाबत आहे.यावरच न थांबता आजपर्यंत आ.श्री.कांदे यांनी मतदार संघातल्या ज्या गावांत बंजारा बहुसंख्येने आहेत,अशा ३५ पेक्षा अधिक ठिकाणी संत सेवालाल महाराज यांचे पुतळे ,आणि २५ पेक्षा अधिक गावांत वीर एकलव्य यांचे पुतळे स्वखर्चाने राज्यस्थान येथे बनवून ते मोठ्या समारंभात प्रदान केले आहेत.आणि पुतळे ज्या ठिकाणी स्थापित केले त्या ठिकाणी सभामंडप ही बांधून दिले आहेत.जेणेकरून त्या -त्या समाजातील गोरगरीब लोकांच्या घरातील लग्नकार्य असो वा धार्मिक कार्यक्रम पार पाडता येतील असा कल्पक व जनहिताचा उपक्रम राबवण्यात आला आहे.

     ख्रिश्चन धर्माच्या मनमाड शहरातील तीन चर्च चे सुशोभीकरण,इदगाह,गुरुद्वारा,मंदिरे,ही कामे तर अगणित आहेत.ती अजूनही होत आहेत.