नाशिक जिल्ह्यातील दोन्ही माजी खासदारांची भिस्त आ.सुहास कांदेंवर... एकाची उमेदवारीसाठी... तर दुसऱ्याची विजयासाठी..!

सा.शनैश्वर टाइम्स वृत्तसेवा

नांदगाव (नाशिक) -: संतोष कांदे

लोकसभेच्या निवडणुकांची धामधूम सुरु झाली आहे,ज्यांना उमेदवारी भेटली त्यांचा प्रचार सुरु ; तर अजून अनेक इच्छुकांना उमेदवारीसाठीच लढावे लागत आहे.जिल्ह्यात मात्र वेगळेच चित्र निर्माण झाले असून,महायुतीच्या दोन्ही माजी खासदारांना नांदगाव विधानसभा मतदार संघाचे विद्यमान आमदार सुहास कांदे यांचा मोठा आधार एकाला विजयासाठी तर  दुसऱ्याला उमेदवारीसाठी वाटत असल्याचे चित्र दिसून येत आहे.

    दिंडोरी लोकसभा मतदार संघाची महायुतीची उमेदवारी अपेक्षेप्रमाणे माजी खासदार तथा केंद्रीय आरोग्य राज्यमंत्री डॉ. भारती पवार यांना यांना जाहीर होऊन त्यांनी प्रचाराला सुरुवात ही केली आहे.कालच त्यांनी नांदगाव येथे आमदार सुहास कांदे यांच्या संपर्क कार्यालयाला भेट देऊन मदतीची विनंती केली.गतवेळी आ.कांदे यांनी डॉ.पवार यांना नांदगाव विधानसभा मतदार संघातून सुमारे १ लाख १० हजार मते मिळवून देत त्यांच्या विजयाचा मार्ग सुकर केला होता.

     यंदा ही शिवसेना व भाजप राज्यात एकत्र असल्याने साहजिकच डॉ.पवार यांची सर्व भिस्त आ.सुहास कांदे यांच्यावर आहे.कारण नांदगाव मतदार संघात खासदार म्हणून डॉ.पवार यांच्या कामकाजाबाबत उघड नाराजी व्यक्त होत असते.रेल्वे थांबा प्रश्न असो वा रेल्वे गेट बंद करून निर्माण झालेला भुयारी मार्ग यासह अनेक बाबतीत जनतेची नाराजी आहे.याउलट आमदार श्री.कांदे यांनी गेल्या चार वर्षात विकासकामांसह,जनतेची जी छोटी मोठी कामे केली आहेत.त्याला तोड नाही.अगदी शुल्लक जातीचा दाखला ही ज्या आमदारांनी घरपोहोच आणून दिला.ह्या कामाची सर कुणालाच येणार नाही.असे आज अभिमानाने बोलले जाते.त्यामुळे डॉ.भारती पवार यांना आ.सुहास कांदे यांच्या मदतीची मोठी अपेक्षा आहे.

    नाशिक लोकसभा मतदार संघाचे माजी खासदार हेमंत गोडसे यांना मात्र अजून तिकिटासाठीच झुंजावे लागत आहे.कारण नाशिक सारख्या महत्वाच्या जिल्ह्यावर आपले वर्चस्व रहावे असे भाजप,राष्ट्रवादी,शिवसेना या तिन्ही मित्र पक्षांना वाटणे साहजिकच आहे.आणि त्यातूनच हा पेचप्रसंग उभा राहिला आहे.माजी मंत्री छगन भुजबळ यांची काही वर्षांपासून या जिल्ह्यावरील पकड ढिल्ली झाली आहे,त्यामुळे त्यांना पुन्हा एकदा येथे आपले बस्तान बसवण्यासाठी लोकसभेची उमेदवारी आवश्यक वाटत आहे.आणि या मतदार संघात आमचे सर्वाधिक आमदार निवडून आले असल्याने आम्हाला येथे पोषक वातावरण आहे.आणि ही प्रभू रामचंद्राची कर्मभूमी असून,आम्ही राममंदिर निर्माण केले असल्याने येथे आमचा विजय निश्चित असल्याचे नमूद करून ही जागा आम्हालाच हवी असा भाजपचा प्रबळ दावा आहे.

     ज्या हेमंत गोडसे यांनी दोन पंचवार्षिक येथून विजय मिळवला त्यांचा मात्र ह्या घडामोडीमुळे जीव टांगणीला लागला आहे.शिवसेनेचे सर्वेसर्वा मुख्यमंत्री ना.एकनाथ शिंदे यांच्या खास मर्जीतील म्हणून नांदगावचे आमदार सुहास कांदे यांचा बोलबाला आहे.आणि आमदार श्री.कांदे यांनी प्रयत्न केला तर ही जागा आपल्यालाच मिळेल असा विश्वास माजी खासदार श्री.गोडसे यांना असल्याने त्यांनी आ.श्री.कांदे यांना सोबत घेऊन मुंबई च्या पर्यायाने वर्षा बंगल्यावर ठाण मांडले असल्याचे दिसून येत आहे.

   एकूणच उमेदवारी साठी गोडसे यांना तर विजयासाठी डॉ.पवार यांना आमदार सुहास कांदे यांचाच आधार वाटत असल्याचे चित्र दिसून येत आहे.