आ.सुहास कांदे यांच्या बेरजेच्या राजकारणाचा पहिला अंक यशस्वी...माजी आ.पवार शिवसेनेत...!

सा.शनैश्वर टाइम्स वृत्तसेवा

नांदगाव (नाशिक) संतोष कांदे

तालुक्याचे आमदार सुहास कांदे यांनी नांदगाव मतदार संघाचा सर्वांगीण विकास साधत असताना बेरजेचे राजकारण ही तितक्याच ताकदीने सुरु ठेवले आहे,याची प्रचिती माजी आमदार संजय पवार यांच्या अधिकृत शिवसेना प्रवेशाने आली आहे.

    मनमाडचा गेल्या कित्येक वर्षाचा पाणीप्रश्न सुटल्यात जमा आहे,औद्योगिक वसाहतीचे काम शासकीय पातळीवर वेगात सुरु आहे.नांदगाव शहर व ग्रामीण भागातील जनतेसाठी पाणी पुरवठा योजनांनी गती पकडली आहे.गावांतर्गत पक्के रस्ते,बहुुद्देशिय सभागृह,मंदिरांसाठी सभामंडप तर अगणित निर्माण केले आहेत.रस्ते,पाणी,सार्वजनिक सुविधा यासह मूलभूत गरजा आणि नुकसानग्रस्तांना वैयक्तिक आर्थिक,अन्नधान्य मदत यामुळे ते तालुक्यात या अगोदरच्या लोकप्रतिनिधींपेक्षा वेगळे ठरले आहेत.

      हे सर्व होत असताना आगामी राजकारण सोयीस्कर व्हावे म्हणून आ.श्री.कांदे यांनी एक -एक मोहरा गळास लावण्याचे काम ही अव्याहतपणे सुरु ठेवल्याचे दिसून येत आहे.काल माजी आमदार पवारांच्या अधिकृत शिवसेना प्रवेशाने पहिला प्रयोग यशस्वी ठरल्याने त्यांचा हुरूप अजून वाढल्याचे दिसून येत आहे.मराठा आरक्षणाच्या मुद्द्यावरून आ.पवारांनी भुजबळांची साथ सोडल्याने पुढे काय.? हा प्रश्न त्यांच्या शिवसेना प्रवेशाने निकाली निघाला आहे.लोकसभा निवडणुकीच्या पार्श्वभूमीवर तसेच आगामी विधानसभा निवडणुकीची रणनीती बघता या पक्षप्रवेशाने आमदार कांदेंच्या राजकीय ताकदीला अजून बळ प्राप्त झाले आहे.

     भालूर गटात व तालुक्याच्या बहुतांश गावात अजूनही माजी आ.पवारांना मानणारा मोठा गट आहे.त्यामुळे ती ताकद आता आमदार सुहास कांदे यांच्या पदरात पडणार असल्याने शिवसैनिकांचा हुरूप वाढला आहे.मुंबईत झालेल्या प्रवेश सोहळ्याला मुख्यमंत्री ना.एकनाथ शिंदे यांच्या प्रमुख उपस्थितीत आ.पवार यांनी भगवा पुन्हा एकदा खांद्यावर घेतला.यावेळी ना.दादा भुसे,संपर्कप्रमुख भाऊसाहेब चौधरी,तालुकाप्रमुख शाईनाथ गिडगे, माजी नगराध्यक्ष बबलू पाटील, माजी सभापती किशोर लहाने,उपस्थित होते.