अखेर मनमाड ला एमआयडीसी आणलीच.! आ. सुहास कांदे यांच्या अथक प्रयत्नांना यश.

सा. श नै श्वर टाइम्स वृत्तसेवा 

नांदगाव (नाशिक ) संतोष कांदे 

.   नांदगाव मतदार संघ व मनमाड शहरातील वाढत्या बेरोजगारीवर मात करण्याच्या दृष्टिकोनातून आमदार सुहास कांदे यांनी सातत्याने पाठपुरावा करत अखेर मनमाड येथे एम.आय.डी.सी.ला अंतिम मंजुरी मिळवल्याने हजारो तरुणांच्या आयुष्याला एक सुखद वळण मिळणार आहे.

     साधारणतः दोन वर्षांपूर्वी मनमाड शहरात मुख्यमंत्री ना. एकनाथ शिंदे यांच्या सोबत आलेल्या उद्योगमंत्री ना. उदय सामंत यांच्याकडे आ. सुहास कांदे यांनी शहरातील बेरोजगार तरुणांची नोकरीसाठी मोठी ससेहोलपट सुरु असल्याचा मुद्दा मांडून या ठिकाणी एम.आय.डी.सी किती आवश्यकता आहे हे सत्य मांडून या ठिकाणी एम.आय.डी.सी. मंजूर करण्याची जोरदार मागणी केली. त्यावेळी उद्योगमंत्री ना. सामंत यांनीही तात्काळ हिरवा कंदील दिला होता.

    आ. श्री. कांदे यांनी त्यानंतर सतत पाठपुरावा सुरूच ठेवला, त्यावर कार्यवाही करण्याच्या दृष्टीने राज्याचे उद्योगमंत्री ना. उदय सामंत,आमदार सुहास कांदे व महामंडळाचे वरिष्ठ अधिकारी यांच्यात २ जुलै २०२४ रोजी मंत्रालयात बैठक होऊन,३ जुलै २०२४ रोजी महाराष्ट्र औद्योगिक विकास महामंडळाच्या उपमुख्य कार्यकारी अधिकारी -३ सोनाली मुळे यांनी सदर प्रस्तावित क्षेत्र सटाणे व अनकवाडे येथे औद्योगिक क्षेत्र स्थापन करण्यास अंतिम मंजुरी दिल्याचे लेखी पत्र आ. सुहास कांदे यांना दिल्याने तालुक्यातील बेरोजगार तरुणांमध्ये उत्साहाचे वातावरण पसरले आहे.

     या पत्रात नांदगाव तालुक्यातील मनमाड येथील सटाणे व अनकवाडे येथील प्रस्तावित क्षेत्रास म.औ. वि.अधिनियम १९६१ च्या प्रकरण ६ व २ खंड (ग ) च्या तरतुदी लागू करण्यास उच्च अधिकार समितीने १२ ऑक्टोबर २०२३ च्या १५७ व्या बैठकीत वन विभागाने नाहरकत दाखला दिलेल्या वरील गावातील प्रस्तावित जागेवर औद्योगिक क्षेत्र स्थापन केले जाणार आहे.त्यांचबरोबर सटाणे व अनकवाडे या दोन गावातील औद्योगिक क्षेत्राला जोडणारा रस्ता तयार करून औद्योगिक महामंडळाकडे वर्ग करण्याचे आदेश ही याच पत्रात देण्यात आले आहेत.