आ. सुहास कांदे यांच्या भगीरथ प्रयत्नाने मनमाडला ऐतिहासिक जलक्रांती.!

सा. श नैश्वर टाइम्स वृत्तसेवा 

मनमाड (nashik ) संतोष कांदे 

आमदार सुहास कांदे यांच्या अथक प्रयत्नांतून साकार झालेली हिंदुहृदयसम्राट बाळासाहेब ठाकरे करंजवण मनमाड पाणीपुरवठा योजनेतून पाणी येण्यास सुरुवात झाल्याने पाण्यासाठी दीर्घकाळापासून असलेल्या प्रश्नाला पूर्ण विराम मिळाला आहे.या योजनेद्वारे भारत नगरमधील जलशुद्धिकरण केंद्रात पाणी पोहोचवण्यात यश आले असून, नागरिकांनी विधिवत जलपूजन करून या ऐतिहासिक क्षणाचा आनंदोत्सव साजरा केला.

.  गतवर्षी या महत्त्वाकांक्षी योजनेचे भूमिपूजन महाराष्ट्राचे मुख्यमंत्री एकनाथ शिंदे यांच्या हस्ते पार पडले होते. मनमाडकर जनतेने स्वनिधीच्या माध्यमातून योजनेला आर्थिक सहाय्य करावे, अशी अपेक्षा होती. मात्र, आमदार सुहास कांदे यांच्या विशेष प्रयत्नांमुळे मुख्यमंत्री एकनाथ शिंदे यांनी मनमाडकरांची वर्गणी माफ करत योजनेचा १००% खर्च शासनाने उचलला. त्यामुळेच ही योजना यशस्वीरीत्या साकारली जाऊ शकली आहे. आज, मनमाडकरांनी बघितलेले जलक्रांतीचे स्वप्न उघड्या डोळ्यांनी खरे ठरत असल्याचा अनुभव घेत आहेत.

.   

करंजवण धरणातून नैसर्गिक उताराने पाणी थेट मनमाडच्या जलशुद्धिकरण केंद्रात पोहचत आहे, ज्यामुळे दररोज एक कोटी लिटर पाणी उपलब्ध होणार आहे. जलशुद्धिकरण केंद्रातून प्रति तास १२ लाख ५० हजार लिटर पाणी शुद्ध केले जाईल आणि मनमाडकरांना दररोज २० तास सलग पाणी पुरवठा होईल. या योजनेत, वीज खर्च कमी करण्यासाठी सौरऊर्जेचा वापर करण्यात आला आहे, ज्यामुळे भविष्यातील खर्च वाचवला जाणार आहे.

.   या योजनेच्या कामाची पाहणी करण्यासाठी आमदार सुहास कांदे यांच्या कार्यालयामार्फत दररोज बस सेवेद्वारे शेकडो नागरिकांना भारत नगर येथील फिल्टरेशन प्लांट आणि करंजवण धरण दिंडोरी येथे जॅकवेल पाहण्यासाठी नेले जाते. या पाहणी दौऱ्यामुळे नागरिकांमध्ये उत्साहाचे वातावरण निर्माण झाले आहे.

.  या ऐतिहासिक क्षणाला उपस्थित असलेले मान्यवर माजी आमदार राजेंद्र देशमुख, युवा सेनेचे जिल्हाप्रमुख फरहान खान, सहसंपर्क प्रमुख अल्ताफबाबा खान, उपजिल्हा प्रमुख सुनील हांडगे, तालुकाप्रमुख शाईनाथ गिडगे, माजी नगरसेवक अमजद पठाण, मनमाड नगरपालिकेचे मुख्याधिकारी शेषराव चौधरी, माजी नगराध्यक्ष बबलू पाटील, महेंद्र शिरसाठ, योगेश इमले, विद्या जगताप, संगिता बागुल, सागर हिरे, दिलीप सूर्यवंशी, मुकुंद झाल्टे, संजय दराडे, छोटू कदम, शशी सोनावणे, आझाद पठाण, संदीप आव्हाड, धनंजय आंधळे, लाला नागरे, आबा नाईक, सचिन दरगुडे, विलास शेळके, कुणाल विसापूरकर, जाफर मिर्झा, निलेश व्यवहारे, सुनील ताठे, चंदू आव्हाड, किरण आहेर आदीसह मनमाड शहरातील महिला व नागरिक मोठ्या संख्येने उपस्थित होते.

शाईनाथ गिडगे आणि अल्ताफबाबा खान यांनी आपल्या मनोगतात सांगितले की, "आमदार सुहास आण्णा कांदे यांच्या अथक प्रयत्नांमुळे मनमाडच्या पाण्याच्या संकटाचा वनवास अखेर संपला आहे."

योजनाबाबत अधिक माहिती देताना सुहास आण्णा कांदे यांनी सांगितले की, "करंजवण धरणातून मनमाडला पाणी मिळवण्यासाठी ८१ किलोमीटरचा नैसर्गिक उताराचा मार्ग पार करण्यात आला आहे, ज्यामुळे वीजेवरील अवलंबित्व कमी होईल. ही योजना महाराष्ट्रातील एकमेव अशा प्रकारची आहे, ज्यामुळे मनमाडकरांना सातत्याने पाणीपुरवठा मिळणार आहे."

नुकतेच पार पडलेल्या आशिया खंडातील सर्वात मोठ्या शिवसृष्टीच्या लोकार्पणानंतर, आता मुख्यमंत्री एकनाथजी शिंदे हिंदुहृदयसम्राट बाळासाहेब ठाकरे करंजवण मनमाड पाणी योजनेच्या लोकार्पणासाठी मनमाड शहरात आगमन करतील का, असा प्रश्न देखील नागरिकांमध्ये आहे.

या जलक्रांतीच्या यशस्वीतेमुळे मनमाड शहरातील नागरिकांमध्ये उत्साहाचं वातावरण असून, सुहास आण्णा कांदे यांचे आभार मानले जात आहेत.