तालुक्यातील बोगस डॉक्टरांवर कडक कारवाई व्हावी यास्तव उपोषण -- रिपाई शहराध्यक्ष जाधव

सा. श नैश्वर टाइम्स वृत्तसेवा 

नांदगाव (नाशिक ) संतोष कांदे 

नांदगाव शहर व तालुक्यातील बोगस डॉक्टर शोधून त्यांच्यावर कडक कारवाई व्हावी, यासाठी आजपासून (ता. १४ ) नांदगाव पंचायत समितीसमोर उपोषण सुरु करणार असल्याचे रिपाई (ए ) चे शहराध्यक्ष महावीर जाधव यांनी प्रसिद्धीस दिलेल्या पत्रकात म्हटले आहे.

   तालुका आरोग्य अधिकाऱ्यांना दिलेल्या निवेदनात गेल्या १७ एप्रिल २०२५ रोजी याच विषयावर निवेदन देण्यात आले होते. तेव्हा कारवाई करू असे आश्वासन देऊन हे उपोषण थांबवण्यात आले. मात्र दोन महिन्याचा कालावधी उलटून गेला, मात्र अपेक्षित कारवाई न झाल्याने आजपासून उपोषण सुरु करण्यात येणार असल्याचे श्री. जाधव यांनी जाहीर केले आहे.

         वैद्यकीय व्यवसाय करत असताना अनेक डॉक्टर दवाखान्याच्या फलकावर घेतलेले शिक्षण किंवा पदवीचा उल्लेख करत नाहीत. त्यामुळे अपेक्षित उपचार मिळवू पाहणाऱ्या रुग्णांचा पैसा खर्च होतोच, मात्र अपेक्षित उपचार ही मिळताना दिसत नाही. परिणामी यामुळे आरोग्याचा गंभीर प्रश्न निर्माण होऊन प्रसंगी जीवास मुकावे लागत असल्याचे जाधव यांनी निवेदनात म्हटले आहे.

तालुका आरोग्य विभागाने  शहर व तालुक्यात विशेष शोध मोहीम  राबवून  डॉक्टरांचा शोध घ्यावा व ज्यांच्या पदव्या बोगस आढळून येतील त्यांच्यावर कडक कारवाई करावी असे शहराध्यक्ष जाधव यांनी म्हटले आहे.