जळगाव बुद्रुक सलग १४ तास जोरदार पर्जन्यवृष्टी.. शेती पिकांचे करोडो रुपयांचे नुकसान..!
सा. श नैश्वर टाइम्स वृत्तसेवा
नांदगाव (nashik ) संतोष कांदे
काल (दि.२७ ) सायंकाळी पाच वाजेपासून नांदगाव तालुक्यातील जळगाव बुद्रुक येथे जोरदार पावसाने हजेरी लावली. हा पाऊस तब्बल १४ तास सलग बरसल्याने येथील उभ्या शेती पिकांचे प्रचंड नुकसान झाल्याने शेतकऱ्यांना करोडो रुपयांचा फटका बसला आहे. या नुकसानीचा तत्काळ पंचनामा होऊन शेतकऱ्यांना मदत देण्याची मागणी शेतकऱ्यांनी केली आहे.
जुलै व ऑगस्ट मध्ये पावसाने उघडीप दिली होती. मात्र अधून -मधून रिमझिम पाऊस येत असल्याने पिकांच्या गुणवत्तेवर अगोदरच परिणाम झाल्याचे दिसून येत होते. मात्र १८ सप्टेंबर पासून आवश्यक नसतानाही जोरदार पाऊस सुरु झाला तो आजतगायत सुरु आहे. या पावसाने हातातोंडांशी आलेली पिके डोळ्यासमोर नष्ट होताना बघण्याची वेळ येथील शेतकऱ्यांवर आली आहे.सर्वाधिक लागवड झालेले मका, बाजरी, भुईमूग, कपाशी, व लाल कांद्याचे रोप असे नगदी पिकांचे अतोनात नुकसान या पावसाने केले आहे.
शेतामध्ये प्रचंड पाणी साचून उभे पीक सडू लागले आहेत. त्यामुळे या पिकाच्या गुणवत्तेवर परिणाम होईलच, मात्र उत्पादनात ही मोठी घट येण्याची शक्यता आहे. त्यामुळे या नुकसानीचे त्वरित पंचनामे होऊन पीकविमा रकमेसह राज्य शासनाकडून रोख रक्कम मिळण्याची आशा शेतकऱ्यांना लागली आहे. व तशी मागणी ही जोर धरू लागली आहे.
Comments
Post a Comment