शिवसेनेच्या जिल्हा संघटनप्रमुखपदी आ.सुहास कांदे.!

सा. श नैश्वर टाइम्स वृत्तसेवा 

नांदगाव (नाशिक ) संतोष कांदे 

गेल्या पंधरा वर्षांपूर्वी खिळखीळी झालेल्या शिवसेनेला पुनर्जीवीत करून सलग दोन पंचवार्षिक विधानसभेचा सोनेरी मुकुट प्राप्त करून देणाऱ्या आमदार सुहास कांदे यांच्या हाती संपूर्ण जिल्ह्याची धुरा सोपवण्यात आल्याने शिवसेनेला जिल्ह्यात नवी झळाळी मिळणार यावर या नियुक्तीने शिक्कामोर्तब झाले आहे.

      शिवसेनेचे प्रमुख तथा उपमुख्यमंत्री ना. एकनाथ शिंदे यांनी होऊ घातलेल्या स्थानिक स्वराज संस्थेच्या निवडणुका लक्षात घेऊन संघटनेत काही प्रमुख बदल केले आहेत. त्यात जिल्ह्यातील संघटनेची वाढ व जास्तीत जास्त सत्ता ताब्यात घेण्याच्या अनुषंगाने नांदगाव तालुक्याचे आमदार सुहास कांदे यांच्यावर नाशिक प्रभारी जिल्हा संघटन प्रमुखपदी नियुक्ती केली आहे.

      आ.श्री. कांदे यांना शिवसेनेत सर्व प्रथम तालुका संघटक हे पद देण्यात आले होते.त्यांनी या पदाचे महत्व ओळखून या तालुक्यात जीर्ण झालेल्या शिवसेनेत नव्या, जुन्या शिवसैनिकांचा मेळ बसवून शिवसेनेला तालुक्याच्या संपूर्ण सत्ता एकहाती मिळवून दिल्या. त्यानंतर कांदे यांना थेट जिल्हाप्रमुख पदाची जबाबदारी देण्यात आली होती.