रात्रभर बरसलेल्या पावसाने जळगाव बुद्रुकला मका व कांदा पिकाचे लाखो रुपयांचे नुकसान.!

सा. श नैश्वर टाइम्स वृत्तसेवा 

नांदगाव (नाशिक ) संतोष कांदे 

या अगोदरच्या पावसाने उभ्या पिकांचे अतोनात नुकसान केले, शासनाने जाहीर केलेली मदत अजून शेतकऱ्यांपर्यंत पोहचली नसतानाच काल रात्री (दि. २५ ) दहा वाजेपासून सकाळी सात वाजेपर्यंत बरसलेल्या पावसाने उभ्या व काढून ठेवलेल्या मका पिकासह, नुकतीच लागवड केलेल्या कांदा पिकाचे लाखो रुपयांचे नुकसान केल्याने येथील बळीराजा हतबल झाला आहे.

     शेतकऱ्यांची दिवाळी काळी जाणार नाही. असे जाहीर केलेल्या शासनाकडून शेतकऱ्यांना अजूनपर्यंत मदत पोहचलेली नसताना कालच्या पावसाने रात्रभर जो धुमाकूळ घातला.त्यामुळे शेतकरी मोठ्या आर्थिक संकटात सापडला आहे. ज्या शेतकऱ्यांना लाल कांदा लागवड करायची होती त्यांनी एकरी नऊ हजार रुपये मोजून मका काढली. अन त्यानंतर कांदा लागवड करण्यासाठी एकरी ४० हजार रुपये ही खाजगी सावकार, बँका, पतपेढी अशा माध्यमातून उपलब्ध करत कांदा लागवड पूर्ण केली. मात्र कालच्या पावसाने पुन्हा एकदा मोठ्या आशा व अपेक्षेने उभारी घेऊ पाहणाऱ्या शेतकऱ्यांना जोरदार तडाखा दिला आहे.

   यंदा तर फक्त कांदा लागवड करण्याचे एकरी दर सुमारे ११ हजार रुपये इतका झाला आहे. त्यामुळे शेतीवरच जीवनमान असणाऱ्या शेतकऱ्यांचे आर्थिक कंबरडे या पावसाने मोडले आहे. गत वर्षाचा अनुभव पदरी असणाऱ्या बहुतांश शेतकऱ्यांनी ५०० ते पाच हजार इतका पीकविमा भरला आहे.आणि त्यानंतर ऑनलाईन, टोल फ्री नंबर द्वारे तक्रारी ही नोंदवल्या आहेत. मात्र त्याबाबतीत ही काहीच हालचाल दिसून येत नसल्याने शेतकरी मेटाकुटीस आल्याचे चित्र जळगाव बुद्रुक चे आहे.