आपदग्रस्त शेतकऱ्यांना सरसकट कर्जमाफी द्यावी.! महेंद्र बोरसे

सा. शनैश्वर टाइम्स वृत्तसेवा 

नांदगाव (nashik ) - संतोष कांदे 

                 केंद्र सरकारच्या दुष्काळ मॅन्युअल २०१७ मध्ये ओला दुष्काळ जाहीर करण्यासंदर्भात कुठलीही तरतूद नसल्याने ओला दुष्काळ जाहीर होण्याची व त्यानुसार भरीव मदत मिळण्याची शक्यता फारच कमी असल्याचा आक्षेप राष्ट्रवादी काँग्रेस शरदचंद्र पवार पक्षाचे तालुकाध्यक्ष महेद्र बोरसे यांनी घेतला असून

केंद्राचे पथक अद्यापपावेतो पाहणीसाठी राज्यात आलेले नाही,सरकारची एकंदरीत मानसिकता बघता राज्यातील शेतकऱ्यांना फक्त अतिवृष्टीची तुटपुंजी मदत देऊन तोंडाला पाने पुसली जातील अशी शक्यता निर्माण झाली असल्याचा आरोप श्री बोरसे यांनी निवेदनात केला आहे.

              केंद्राच्या NDRF आणि राज्याच्या SDRF मदतीनुसार केंद्र सरकार ७५% तर राज्य सरकार २५% रक्कम देते,SDRF मदतीच्या दरात बदल करण्याचा अधिकार राज्य सरकारला आहे,परंतू गरज सरो वैद्य मरो ह्या न्यायाने विधानसभा निवडणूक संपल्यावर सरकारने ३० मे २०२५ रोजीच्या शासन निर्णयाने खरीप हंगाम २०२५ अंतर्गत शेतपिकांच्या नुकसान भरपाई रकमेत कपात केली आहे.तसेच कमाल तीन ऐवजी दोन हेक्टर पर्यंतच मदत देण्याचा निर्णय घेतला आहे.राज्यावर ओढवलेल्या गंभीर संकटात केंद्र सरकारने अतिरिक्त भरीव मदत उपलब्ध करून देणे अपेक्षित असताना राज्याच्या हक्काची जीएसटी परतावा रक्कम आगाऊ स्वरूपात देऊ करून ह्या गंभीर परिस्थितीत आपली उदासीन भूमिका अधोरेखित केली आहे.केंद्र सरकारने सर्व राज्य सरकारांना करांचे अग्रीम हस्तांतरण केले असून त्यात महाराष्ट्राला ६ हजार ४१८ कोटी रुपये प्राप्त झाले आहेत,राज्याच्या हक्काची ही रक्कम शेतकरी,पायाभूत सुविधा,शिक्षण,आरोग्य आणि सार्वजनिक क्षेत्रातील योजना गतिमान करण्यासाठी वापरली जाऊ शकते,या रकमेतून प्रत्यक्ष शेतकऱ्यांना किती दिलासा मिळेल हा औत्सुक्याचा भाग आहे.अतिवृष्टीमुळे जास्तीत जास्त दोन हेक्टर पर्यन्त प्रति हेक्टरी ८५०० मदत मिळणार आहे,ओला दुष्काळ जाहीर झाल्यास अतिवृष्टीच्या मदतीपेक्षा अधिक व्यापक मदत मिळेल त्यात कर्जमाफी किंवा कर्ज फेडायला मुदतवाढ,पिकविमा,जमीन महसुलातून सूट,शैक्षणिक शुल्क माफी,वीज बिल माफी,घर,जनावरे,शेततळे इत्यादींच्या नुकसानीची भरपाई,रोजगार हमी योजना अंतर्गत काम,चारा छावण्या,मोफत अन्नधान्य,आरोग्य शिबिरे,जीवनावश्यक गरजा पूर्ण करण्यासाठी थेट मदत होत असते.सध्या तरी अशी कुठलीही कारवाई होत नसल्याने शेतकरी हवालदील झाला आहे,सरकारने राज्यात उद्भवलेल्या गंभीर आपत्ती निवारणासाठी विशेष पॅकेज जाहीर करावे,कागदी घोडे न नाचवता,अतिरिक्त अटी शर्थी न लावता ओला दुष्काळ जाहीर करून सरसकट कर्जमाफी करावी अशी मागणी राष्ट्रवादी काँग्रेस पक्ष शरदचंद्र पवार नांदगाव यांच्या वतीने करण्यात आली आहे.