न्यायडोंगरी गटात विद्यमान आमदारांची कसोटी लागणार.? की,सत्तेसाठी झालेली दिलजमाई यशस्वी ठरणार.?

जिल्हा परिषद निवडणूक विशेष वार्तापत्र 

सा. श नैश्वर टाइम्स वृत्तसेवा 

नांदगाव (नाशिक ) संतोष कांदे 

करोडो भक्तांचे आराध्य दैवत श्री. शनी देवाचे अस्तित्व असलेल्या न्यायडोंगरी जिल्हा परिषद गटाची होऊ घातलेली निवडणूक अनेक अर्थाने ऐतिहासिक ठरणार आहे. याचे कारण असे की, राज्यात जरी काँग्रेस शिवसेना (उबाठा)  एकत्र असले तरी या गटात मात्र शिवसेना ( शिंदे ) अन काँग्रेस हातात हात घेऊन लढणार आहेत.आणि तसेही संपूर्ण बहुमत शिवसेनेचे असलेल्या नांदगाव कृषी उत्त्पन्न बाजार समितीत काँग्रेसचा सभापती विराजमान आहे.

    या न्यायडोंगरी जिल्हा परिषद गटात २० गावांचा समावेश असून, सावरगाव व न्यायडोंगरी असे दोन गण आहेत. या गटावर सातत्याने आहेर कुटुंबाचा वरचष्मा राहिल्याचे दिसून येते. अपवाद शोभाताई कवडे व कै.शशिकांत मोरे यांचा वगळता....मात्र याच गटात आहेर कवडे एकत्र असतानाही तेज कवडे यांचा झालेला पराभव दुर्लक्षिता येणार नाही.

     माणिकपुंज धरणाचा फायदा या गटातील बहुतांश गावांना करून देण्यात माजी आमदार अँड.अनिल आहेर यांचा सिंहाचा वाटा असल्याने त्यांना मानणारी दुसरी पिढी या गावांत दिसून येते. मुळात हे कार्यकर्ते कै. विजुमामा आहेर यांचे मात्र अँड. आहेर आमदार झाल्यानंतर या कार्यकर्त्यांची वैयक्तिक म्हणा किंवा लोकहिताची कामे आहेर करू लागल्याने साहजिकच मामांचे कार्यकर्ते दादांचे झाले.

     या मतदार संघात कै. भाऊसाहेब हिरे यांच्यानंतर लाल दिवा आणण्याचे भाग्य माजी आमदार अँड. आहेरांना लाभले. जिल्हा परिषद अध्यक्ष पदाच्या निमित्ताने  हा झाला इतिहास.... आज तालुक्याचे लोकप्रतिनिधी म्हणून सुहास कांदे विराजमान आहेत. त्यांची ही दुसरी टर्म आहे. विरोधकांना आपलेसे करून घेत त्यांनी आपली घोडदौड सुरु ठेवली आहे. शिवसेना पक्षफुटी वेळेस त्यांनी एकनाथ शिंदे यांना ठाम पाठींबा दिल्याचे फळ त्यांना भव्य दिव्य असे मिळाले असे म्हटले तर ते वावगे ठरणार नाही. कुठल्या मंत्र्यांच्या मतदार संघात होणार नाहीत. अन झाली नाहीत. अशी कामे त्यांनी गेल्या टर्म मधल्या अडीच वर्षात केलीत. सुमारे साडे तीन हजार कोटींचा निधी आणणे अशक्यप्राय बाब होती. पण त्यांनी ती शक्य करून दाखवली.

    प्रदीर्घ कालावधी नंतर होऊ घातलेल्या या जिल्हा परिषद निवडणुकीत गट व गणातल्या निवडणुकीसाठी आमदार कांदे यांच्याकडे उमेदवारी मागणाऱ्यांची मोठी रस्सीखेच असल्याचे दिसून येत आहे. तर देण फुकट जाऊ द्यायची नाही म्हणून विरोधी पक्ष व अपक्ष उमेदवार ही रिंगणात उतरणार आहेत. मात्र उमेदवारी चुकली तर सत्ताधारी आमदारांच्या विरोधात ही लोक उमेदवार निवडून देतात.हा इतिहास भालूर गट (अशोक जाधव ) व न्यायडोंगरी ( कै. शशिकांत मोरे गण ) पुरेसा बोलका आहे.

    माजी सभापती विलास आहेर शिवसेनेत असले तरी माजी आमदारांचे भाऊ असल्याने गेल्या काही दिवसांपासून त्यांचा कौटुंबिक जिव्हाळा वाढला आहे. आपापसात बसून गट व गणाची उमेदवारी कुणी करायची याचा निर्णय ते घेणार आहेत. यावरून आहेरांनी काळाची पाऊले ओळखली आहेत. असे म्हणता येईल.या गटात इच्छुक असणाऱ्या सुभाष कुटे यांना यापूर्वी पंचायत समितीचे सभापती पद आमदार कांदे यांनी दिले असल्याने ऐनवेळी ते आहेरांसाठी थांबू शकतात. तर अपक्ष म्हणून भगवान सोनावणे ठाम आहेत. आणि मंत्री ना. छगन भुजबळ यांनी संधी दिल्यास लढण्याची तयारी प्रसाद सोनवणे या नव्या दमाच्या कार्यकर्त्यांची आहे. शरद पवार गटाचे तालुकाध्यक्ष महेंद्र बोरसे यांनी पंकज भुजबळ आमदार असल्याच्या काळात सहाय्यक म्हणून काम करताना सर्वच समाज घटकात मोठा मित्र परिवार जमवला आहे. त्यामुळे त्यांचा उमेदवार कोण असेल यावर ही बरीच राजकीय गणिते अवलंबून असणार आहेत.

मराठा,बंजारा, वंजारी, धनगर, माळी, ठाकर, भिल्ल, बौद्ध, अशा क्रमाने असलेल्या सामाजिक समतोलाचा विचार करून उमेदवाऱ्या द्याव्या लागणार आहेत. उबाठा गटाचे अस्तित्व फक्त शहरापुरतेच मर्यादित झाल्याचे दिसून येत असले तरी अनेक गावांत निष्ठावंत शिवसैनिक आहेत. त्यामुळे शरद पवार गटाच्या मदतीने ते एखाद्या अपक्ष उमेदवाराला पाठींबा देऊन लढतीत गंमत आणू शकतात. हे ही नाकारून चालणार नाही.